Anar Əliyev: Ölkəmizdə icra olunan beş böyük sosial islahat paketi dörd milyon nəfəri əhatə edib VİDEO
Bakı, 29 may, Göyçək Mahmudlu, AZƏRTAC
Prezident İlham Əliyevin sosial sahədə apardığı ardıcıl və məqsədyönlü siyasətin nəticəsi olaraq son illər ərzində ölkəmizdə 5 böyük sosial islahat paketi həyata keçirilib. Həmin islahatların illik əlavə maliyyə tutumu 7,6 milyard manat olmaqla 4 milyon nəfəri əhatə edib. Nəticədə bu dövrdə minimum əməkhaqqı 3,1 dəfə, minimum pensiya 2,9 dəfə, orta aylıq pensiya 2,6 dəfə, orta aylıq əməkhaqqı isə 2 dəfəyədək artıb. Sosial müavinət və təqaüd ödənişlərinin həcmi isə 5 dəfə artaraq 400 milyon manatdan 1,9 milyard manata çatıb. Ünvanlı dövlət sosial yardımın orta məbləği 2,6 dəfə, yaşayış minimumu 65 faiz, ehtiyac meyarı isə 2,2 dəfə artıb. Bu ildən icrasına başlanmış yeni sosial islahat paketi isə 3 milyon nəfəri əhatə edir. Həmin məqsədlə dövlət büdcəsindən illik 1,4 milyard manat əlavə vəsait ayrılıb.
AZƏRTAC xəbər verir ki, bunu əmək və əhalinin sosial müdafiəsi naziri Anar Əliyev "Müasir dünyanın çağırışları kontekstində sosial müdafiə sistemlərinin uyğunlaşdırılması" mövzusunda beynəlxalq konfransın açılış mərasimində deyib.
"Şəhid ailələrinin və müharibə əlillərinin sosial müdafiəsi daim dövlətin diqqət mərkəzində saxlanılıb. Postmüharibə dövründə nazirlik tərəfindən həyata keçirilmiş tədbirlər nəticəsində 131 min unikal şəxsə 384 min xidmət göstərilib, o cümlədən müavinət və təqaüdlər orta hesabla 2 dəfəyədək artırılıb. Mənzil və avtomobil təminatı, məşğulluq məsələlərinin həlli, sosial-psixoloji dəstək və reabilitasiya xidməti təqdim edilib. Həmçinin "Böyük Qayıdış" proqramı çərçivəsində nazirlik tərəfindən keçmiş məcburi köçkünlərin işğaldan azad edilmiş ərazilərdə məşğulluğunun və sosial rifahının təmin olunması üçün tədbirlər davam etdirilib", - deyə nazir bildirib.
Anar Əliyev ölkəmizdə fəaliyyət göstərən DOST mərkəzlərinin də sosial xidmət sahəsində innovativ model kimi beynəlxalq miqyasda nümunə kimi göstərildiyini diqqətə çatdırıb. Qeyd edilib ki, indiyədək 9 DOST mərkəzi filial və məntəqəsi üzrə təqdim edilən 161 xidmət vasitəsilə 3 milyon 400 mindən çox vətəndaşa xidmət göstərilib. Ümumi vətəndaş məmnunluğu 98,4 faiz təşkil edib. Qeyri-formal məşğulluğun azaldılması istiqamətində görülən tədbirlər barədə məlumat verən nazir bunun sosial ədalətin gücləndirilməsi və iqtisadi şəffaflığın təmin olunması baxımından mühüm əhəmiyyət kəsb etdiyini vurğulayıb. Bu baxımdan əmək bazarında da müsbət dinamikanın müşahidə olunduğu bildirilib: "Görülmüş işlər nəticəsində ölkə üzrə əmək müqavilələrinin sayı 46 faizdən, əməkhaqqı fondu isə 3 dəfədən çox artıb, işsizlik səviyyəsi hazırda 5.2 faiz təşkil edir. Hazırda hər ay 2,3 milyondan çox vətəndaşa pensiya, müavinət, təqaüd, kompensasiya və ünvanlı sosial yardım üzrə ödənişlər mərkəzləşmiş qaydada həyata keçirilir. Ötən müddət ərzində Dövlət Sosial Müdafiə Fondunun maliyyə dayanıqlığı daha da artırılıb, son 6 ildə fondun ümumi gəlirləri 2 dəfədən çox, sosial sığorta haqları üzrə gəlirləri isə 2.7 dəfə artıb. Sosial sahədə aparılmış islahatların nəticəsi olaraq əhaliyə ödənişlərlə bağlı xərclər isə 2 dəfəyə yaxın çoxalıb".
Bölmənin digər xəbərləri
