Bakı, 16 yanvar, Göyçək Mahmudlu, Ələkbər Baxşıyev, Orxan Kərimov, AZƏRTAC

Yanvarın 16-da Azərbaycanın Milli Qəhrəmanı Şahin Tağıyev Hərbi Memorial Məzarlıqda dəfn edilib.

AZƏRTAC xəbər verir ki, əvvəlcə Azərbaycanın Milli Qəhrəmanı ilə vida mərasimi keçirilib. Mərasimdə dövlət qurumlarının təmsilçiləri, ictimaiyyət nümayəndələri, mərhumun ailə üzvləri, doğmaları və döyüş yoldaşları iştirak ediblər.

Daha sonra Şahin Tağıyevin nəşi Azərbaycan Respublikasının Dövlət Himninin sədaları və yaylım atəşi altında torpağa tapşırılıb.

Azərbaycanın Milli Qəhrəmanının ruhuna dualar oxunub, məzarı üzərinə tər güllər düzülüb, əklil qoyulub.

Xatırladaq ki, əslən Şuşadan olan Şahin Talıb oğlu Tağıyev 1949-cu il fevralın 3-də Tərtər şəhərində anadan olub. 1969-cu ildə Energetika Texnikumunu bitirib və təyinatla Rusiyanın Udmurt vilayətinə göndərilib. Gənc yaşlarından Rusiya və Azərbaycanda energetika, ticarət sahələrində fəaliyyət göstərən Şahin Tağıyev 1988-ci ildə Milli Azadlıq Hərəkatına qoşulub. 1991-ci ildə könüllü olaraq Qarabağ müharibəsinə qatılan qəhrəman leytenant rütbəsində bölük komandiri kimi döyüşlərə rəhbərlik edib. 1992-ci ildə həmin bölüyün bazasında yaradılan “Qurtuluş” batalyonunun komandiri təyin edilərək Ağdərə istiqamətində düşmən cəbhəsinin yarılmasında, eləcə də Tərtər, Seysulan, Yarımca və Levonarx istiqamətlərində aparılan döyüşlərdə xüsusi igidlik nümayiş etdirib. Dekabrın 29-da İsveç Krallığının Malmö şəhərində uzunsürən xəstəlikdən sonra vəfat edib.

Şahin Tağıyevin cənazəsi Azərbaycan Respublikasının Diasporla İş üzrə Dövlət Komitəsinin dəstəyi və təşkilatçılığı ilə yanvarın 15-də gecə saatlarında Vətənə gətirilib.

Milli Qəhrəmanın oğlu Rövşən Tağıyev atasının Vətən sevgisindən övladlarına və nəvələrinə də pay verdiyini, onları vətənpərvər ruhda böyütdüyünü deyib. “2020-ci ildə, Vətən müharibəsi dövründə atam Vətənə gəlmək istəyirdi. O, keçmiş döyüşçü kimi müharibəyə qoşulmaq və döyüşmək arzusu ilə alışıb-yanırdı. Lakin koronavirus pandemiyası və yaşının çoxluğu səbəbindən döyüşmək alınmadı. Ürəyi Vətəndə qalmışdı, cəbhədən gələn xəbərlərin birini belə qaçırmırdı. Milli Qəhrəman kimi aldığı təqaüdü Azərbaycan Silahlı Qüvvələrinə Yardım Fondunun hesabına köçürmüşdü. Torpaqların qarış-qarış azad edilməsi onun üçün əvəzedilməz bir duyğu idi. Hər gün Qələbə xəbəri gələndə sevinirdi. Noyabrın 8-də işdə idim. Zəng edib, Şuşanın azad olunduğunu dedi və ağladı. Bakıya gələndə gedib Qarabağı gəzdi, Şuşanı ziyarət etdi”, - deyə o diqqətə çatdırıb.

Mərhumun dayısı qızı Simuzər Xalıqova Şahin Tağıyevin Vətən sevdalısı olduğunu, 44 günlük Vətən müharibəsində qazanılan Zəfər zamanı zəng edərək, Qələbə sevincini göz yaşları içərisində bölüşdüyünü bildirib: “Müharibə zamanı Prezident İlham Əliyevin çıxışlarını diqqətlə izləyir, hər gün gələn Qələbə sədasından qürurlanırdı. Birinci Qarabağ müharibəsində pərakəndəlik idi. Ordunu Ulu Öndər Heydər Əliyev formalaşdırdı. Prezident İlham Əliyevin rəhbərliyi ilə Azərbaycan Ordusunun güclənməsi və möhkəmlənməsi davam edir. Şahin bunları gördükcə, çox sevinirdi. Ölkə rəhbərliyinə, dövlət qurumlarına təşəkkürümü bildirirəm ki, onun cənazəsinin Vətənə gətirilməsi və adına layiq şəkildə dəfn olunması təşkil edildi”.

Şahin Tağıyevlə bağlı xatirələrini bölüşən dostu Ələsgər Rüstəmov onun mülayim, eyni zamanda, çılğın biri olduğunu deyib: “Mən Ağdam istiqamətində döyüşmüşəm. O isə Tərtər, Ağdərə istiqamətlərində gedən döyüşlərdə iştirak edib. Mənim 23, onun 40 yaşı var idi. Fərqli istiqamətlərdə olsaq da, bir-birimizdən xəbərimiz olurdu. Döyüş yoldaşları onu çox istəyirdilər. O zaman tankın üzərində ov tüfəngi ilə gedirdik. Ordumuzun arsenalı müasirləşdirildi, peşəkarlıq artırıldı. Nəticədə biz qalib olduq. İndi fəxrlə deyirik ki, torpaqlarımız azad edildi. Şahinə də Qələbəni görmək nəsib oldu”.

Birinci Qarabağ müharibəsi iştirakçısı, taqım komandiri Əhli Həbiyev 1992-ci ilin noyabrından 1993-cü ilin aprelinə qədər “Qurtuluş” batalyonunda Şahin Tağıyevlə birlikdə döyüşlərdə iştirak etdiyini diqqətə çatdırıb. “Şahin çox mərd, vətənpərvər, qorxmaz biri idi. Onunla Ağdərə rayonunun Sırxavənd, Çıldıran kəndləri istiqamətində bir yerdə döyüşmüşük. O, Birinci Qarabağ müharibəsində torpaqlar əldən getdikcə ağlayırdı. İkinci Qarabağ müharibəsində isə sevincinin həddi-hüdudu yox idi. Ona Qələbədən sonra gəlib Şuşanı gəzmək də nəsib oldu. Yenə Vətənə gəlməli və bizimlə görüşməli idi, bu dəfə qismət olmadı, başqa cür gəldi...”, - deyə o bildirib.

11:30

Yanvarın 16-da Azərbaycanın Milli Qəhrəmanı Şahin Tağıyev Hərbi Memorial Məzarlıqda dəfn edilib.

AZƏRTAC xəbər verir ki, əvvəlcə Azərbaycanın Milli Qəhrəmanı ilə vida mərasimi keçirilib. Mərasimdə dövlət və ictimaiyyət nümayəndələri iştirak ediblər.

Daha sonra Şahin Tağıyevin nəşi Azərbaycan Respublikasının Dövlət Himninin sədaları və yaylım atəşi altında torpağa tapşırılıb.

Azərbaycanın Milli Qəhrəmanının ruhuna dualar oxunub, məzarı üzərinə tər güllər düzülüb, əklil qoyulub.

Xatırladaq ki, əslən Şuşadan olan Şahin Talıb oğlu Tağıyev 1949-cu il fevralın 3-də Tərtər şəhərində anadan olub. 1969-cu ildə Energetika Texnikumunu bitirib və təyinatla Rusiyanın Udmurt vilayətinə göndərilib. Gənc yaşlarından Rusiya və Azərbaycanda energetika, ticarət sahələrində fəaliyyət göstərən Şahin Tağıyev 1988-ci ildə Milli Azadlıq Hərəkatına qoşulub. 1991-ci ildə könüllü olaraq Qarabağ müharibəsinə qatılan qəhrəman leytenant rütbəsində bölük komandiri kimi döyüşlərə rəhbərlik edib. 1992-ci ildə həmin bölüyün bazasında yaradılan “Qurtuluş” batalyonunun komandiri təyin edilərək Ağdərə istiqamətində düşmən cəbhəsinin yarılmasında, eləcə də Tərtər, Seysulan, Yarımca və Levonarx istiqamətlərində aparılan döyüşlərdə xüsusi igidlik nümayiş etdirib. Dekabrın 29-da İsveç Krallığının Malmö şəhərində uzun sürən xəstəlikdən sonra vəfat edib.

Şahin Tağıyevin cənazəsi Azərbaycan Respublikasının Diasporla İş üzrə Dövlət Komitəsinin dəstəyi və təşkilatçılığı ilə yanvarın 15-də gecə saatlarında Vətənə gətirilib.

11:16

Yanvarın 16-da Hərbi Memorial Məzarlıqda Azərbaycanın Milli Qəhrəmanı Şahin Tağıyevlə vida mərasimi keçirilir.

AZƏRTAC xəbər verir ki, mərasimdə dövlət və ictimaiyyət nümayəndələri iştirak edirlər.

Xatırladaq ki, əslən Şuşadan olan Şahin Talıb oğlu Tağıyev 1949-cu il fevralın 3-də Tərtər şəhərində anadan olub. 1969-cu ildə Energetika Texnikumunu bitirib və təyinatla Rusiyanın Udmurt vilayətinə göndərilib. Gənc yaşlarından Rusiya və Azərbaycanda energetika, ticarət sahələrində fəaliyyət göstərən Şahin Tağıyev 1988-ci ildə Milli Azadlıq Hərəkatına qoşulub. 1991-ci ildə könüllü olaraq Qarabağ müharibəsinə qatılan qəhrəman leytenant rütbəsində bölük komandiri kimi döyüşlərə rəhbərlik edib. 1992-ci ildə həmin bölüyün bazasında yaradılan “Qurtuluş” batalyonunun komandiri təyin edilərək Ağdərə istiqamətində düşmən cəbhəsinin yarılmasında, eləcə də Tərtər, Seysulan, Yarımca və Levonarx istiqamətlərində aparılan döyüşlərdə xüsusi igidlik nümayiş etdirib. Dekabrın 29-da İsveç Krallığının Malmö şəhərində uzun sürən xəstəlikdən sonra vəfat edib.

Şahin Tağıyevin cənazəsi Azərbaycan Respublikasının Diasporla İş üzrə Dövlət Komitəsinin dəstəyi və təşkilatçılığı ilə yanvarın 15-də gecə saatlarında Vətənə gətirilib.