Səməd Vurğunun irsini yaşadan gənc pianoçu Vurğun Vəkilov VİDEO
Bakı, 13 may, AZƏRTAC
Bəzən bir insanın yaradıcılığı onun mənsub olduğu nəslin yaddaşı ilə səsləşir. Keçmişdən gələn ədəbi və mənəvi dəyərlər yeni dövrdə fərqli sənət dili ilə yaşamağa başlayır. Beynəlxalq müsabiqələr laureatı, Vurğun Vəkilovun fəaliyyəti də bu baxımdan diqqət çəkir. O, bir tərəfdən Səməd Vurğunun zəngin irsini yaşadan ev-muzeyinə rəhbərlik edir, digər tərəfdən isə musiqi yaradıcılığı ilə öz sənət yolunu formalaşdırır. Onun sənət baxışında ailədən gələn mədəni yaddaş müasir musiqi dili ilə yeni çalarlar qazanır.
AZƏRTAC-ın müxbiri ilə həmsöhbət olan Vurğun Vəkilov bildirib ki, onun yaradıcılıq yolunun formalaşmasında ailə mühiti və bu mühitdən qaynaqlanan mədəni irs mühüm rol oynayıb.
Azərbaycanın Xalq şairi Səməd Vurğunun ailəsində formalaşan zəngin mədəni atmosfer onun dünyagörüşünə və musiqi zövqünə ciddi təsir göstərib. Evdə daim musiqi səslənməsi onun sənətə bağlılığını daha da gücləndirib.
O, Bülbül adına Orta İxtisas Musiqi Məktəbini fortepiano ixtisası üzrə fərqlənmə ilə bitirib və həmin ildə Üzeyir Hacıbəyli adına Bakı Musiqi Akademiyasına qəbul olub. Təhsil aldığı illər ərzində iştirak etdiyi bir çox respublika və beynəlxalq festivallar və müsabiqələrdə qazandığı yüksək nailiyyətlərə görə, 2009-cu ildə ölkə başçısının müvafiq Sərəncamı ilə onun adı Azərbaycanın gənc istedadlarının “Qızıl kitabı”na yazılıb. Həmçinin 2017-ci ildə “Gənclər üçün Prezident mükafatı”na layiq görülüb. Bu mükafatlar onun sənət yolunda qazandığı uğurların və istedadının təsdiqidir.
Vurğun Vəkilovun həyatında dönüş nöqtələrindən biri Fransada keçirilən beynəlxalq müsabiqədə laureat olması olub. Bu uğur ona Parisdə təhsil almaq imkanı qazandırıb və 2017-ci ildə o, Fransaya yollanaraq musiqi təhsilini orada davam etdirib. Tanınmış pianoçu Rəna Mustafabəyli-Şereşevskayanın sinfində təhsil alması onun peşəkar inkişafında mühüm rol oynayıb. Beynəlxalq musiqi mühiti, fərqli sənət məktəbləri və böyük səhnə təcrübəsi Vurğun Vəkilovun ifaçılıq üslubunu daha da zənginləşdirib.
Gənc istedad Səməd Vurğunun nəticəsi olmağın onun üçün ilk növbədə böyük məsuliyyət olduğunu deyib: “Heç zaman bu addan şəxsi üstünlük kimi istifadə etməmişəm. Öz yolumu zəhmət və sənətlə davam etdirirəm. Bu irs mənə yalnız əlavə stimul və mənəvi dayaq verib. Əsas məqsədim daşıdığım adı layiqincə təmsil etməkdir. Bu il Xalq şairi Səməd Vurğunun 120 illik yubileyi qeyd olunur. Bu əlamətdar tarix ədibin zəngin yaradıcılığının, milli ədəbiyyat və mədəniyyətə verdiyi misilsiz töhfələrin bir daha xatırlanması baxımından xüsusi əhəmiyyət daşıyır. Onun poeziyası Azərbaycan ədəbi fikrində dərin iz buraxaraq bu gün də yeni nəsillər üçün ilham mənbəyi olaraq qalır. Hazırda Səməd Vurğunun yaradıcılığı ilə bağlı yeni layihələr üzərində də düşünürük. Gənc bəstəkarlar arasında müsabiqələrin təşkili, şairin sözlərinə yeni musiqi əsərlərinin yazılması kimi təşəbbüslər həm klassik irsin yenidən aktuallaşdırılmasına, həm də gənclərin sənətə marağının artırılmasına xidmət edə bilər”.
Səməd Vurğunun müəllifi olduğu şeirlərdən onun üçün xüsusi olan hansıdır sualına cavab olaraq Vurğun Vəkilov deyib ki, “Azərbaycan” şeiri ona çox doğmadır. Onun fikrincə, bu əsər yalnız yüksək bədii dəyəri və emosional gücü ilə deyil, həm də milli kimliyi, Vətən sevgisini və Azərbaycan ruhunu dolğun şəkildə ifadə etməsi ilə seçilir.
Gənc pianoçu bu gün müasir Azərbaycan mədəniyyətinin diqqətçəkən simalarından biri kimi həm keçmişin zəngin irsini qoruyur, həm də gələcəyin musiqisini həmin möhkəm təməllər üzərində qurur. Onun ifasında səslənən hər bir əsər poeziya ilə musiqinin, tarixlə müasirliyin qovuşduğu xüsusi bir sənət harmoniyası yaradır.
Bölmənin digər xəbərləri
