Böyük Qayıdışın növbəti ünvanı – Şükürbəyli kəndində həyat yenidən canlanır VİDEO
Cəbrayıl, 15 may, AZƏRTAC
İşğaldan azad edilmiş ərazilərdə genişmiqyaslı bərpa və yenidənqurma işləri uğurla davam etdirilir. Keçmiş məcburi köçkünlər “Böyük Qayıdış” proqramı çərçivəsində mərhələli şəkildə öz doğma yurdlarına qovuşurlar. Artıq Cəbrayılın Şükürbəyli kəndində də həyat yenidən canlanıb. Mayın 9-da kəndə qayıdan ilk ailələrə evlərinin açarları Prezident İlham Əliyev tərəfindən təqdim olunub.
AZƏRTAC-ın bölgə müxbiri xəbər verir ki, Şükürbəyli Cəbrayıl rayonunun eyniadlı inzibati ərazi dairəsində, rayon mərkəzindən 18 kilometr cənub-şərqdə, düzənlik ərazidə yerləşir. Kənd 1993-cü ildə Ermənistan silahlı qüvvələri tərəfindən işğal olunmuşdu. İşğaldan əvvəl burada məktəb, klub, kitabxana və xəstəxana fəaliyyət göstərib, əhali əsasən üzümçülük, heyvandarlıq, taxılçılıq və baramaçılıqla məşğul olub.
Şükürbəyli kəndi 2020-ci ildə Vətən müharibəsi zamanı rəşadətli Azərbaycan Ordusu tərəfindən işğaldan azad edilib. Prezident İlham Əliyev tərəfindən 2023-cü ildə təməli qoyulan kənd qısa müddətdə müasir standartlara uyğun şəkildə yenidən qurulub.
Kənddə sakinlərin rahat yaşayışı və sosial rifahının təmin olunması məqsədilə mühüm infrastruktur layihələri həyata keçirilib. Burada hər biri 80 yerlik olmaqla iki körpələr evi-uşaq bağçası, həkim məntəqəsi, musiqi məktəbi, klub-icma mərkəzi, həmçinin yerli icra strukturları üçün inzibati bina tikilib. Eyni zamanda, 35/10 kV-luq elektrik yarımstansiyası inşa edilib, kənd elektrik enerjisi, təbii qaz, içməli su, rabitə, internet və “İP TV” şəbəkələri ilə təmin olunub, yollar asfaltlanıb.
Şükürbəyliyə rayonun Şıxalıağalı, Dəjəl kəndlərinin və Mahmudlu qəsəbəsinin sakinləri də daxil olmaqla, ümumilikdə, 2522 nəfərin - 615 ailənin köçürülməsi nəzərdə tutulur. İlkin mərhələdə 635 fərdi ev istifadəyə verilib. Onlardan 615-i sakinlər, 20-si isə xidməti istifadə üçün ayrılıb. Müasir memarlıq üslubunda inşa olunan evlər 2, 3, 4 və 5 otaqlıdır.
Məcburi Köçkünlərin Sosial İnkişaf Fondunun direktor müavini Vüqar İmranov bildirib ki, kənddə ənənəvi enerji ilə yanaşı, günəş enerjisindən də istifadə olunur. "Layihələr çərçivəsində kənd daxilində 25 kilometr yol inşa edilib. Bundan əlavə 3 ədəd biraşırımlı avtomobili körpüsü, 2 ədəd piyada körpüsü tikilib. Burada, həmçinin sosial obyektlər, 360 yerlik məktəb, hər biri 80 yerlik 2 uşaq bağçası, inzibati bina tibb məntəqəsi, 350 klub və musiqi məktəbi də inşa olunub. Təbii fəlakətlər zamanı kəndin sel sularından mühafizəsi üçün 4019 metr uzunluqda beton kanal da tikilib”, - deyə o əlavə edib.
Murad Süleymanov Şükürbəyli kəndinə yenidən köçən sakinlərdəndir. Deyir ki, doğma yurda qovuşmaq qürurverici bir hissdir: “1993-cü ildə doğma yurdumuzdan məcburi köçkün düşdük. Əvvəlcə Beyləqanda məskunlaşdıq, 15 il orada yaşadıq. Daha sonra dövlətimiz tərəfindən Biləsuvar rayonu ərazisində salınan qəsəbədə 18 il yaşadıq. Ən böyük arzumuz isə torpaqlarımıza, doğma yurdumuza qayıtmaq idi. 2020-ci ildə Ali Baş Komandan İlham Əliyevin rəhbərliyi ilə müzəffər ordumuz tarix yazaraq torpaqlarımızı azad etdi. Bu gün isə azad olunan yurdlar yenidən qurulur. Bizim Şükürbəyli kəndi də müasir və gözəl şəraitdə yenidən inşa edilib. Altınəfərlik ailə olaraq qayıtmışıq və 4 otaqlı evlə təmin olunmuşuq. Allah şəhidlərimizə rəhmət eləsin, qazilərimizə şəfa versin”.
Savalan Məmmədov da doğma yurda qayıtmağından qürur hissi ilə danışır: “Bura mənim ata yurdumdur. Bax, o gördüyünüz ağaclıq yer mənim atamın ocağı olub. Ailədə 6 qardaş, 1 bacı olmuşuq. Ailə qurduqca kəndin müxtəlif yerlərində ev tikib köçmüşük. Sonra köçkün düşdük. İndi isə doğma kəndimizə qayıtmışıq. Sevincimizin həddi-hüdudu yoxdur. Allahdan Prezidentimizə cansağlığı arzulayıram, şəhidlərimizin ruhu qarşısında baş əyirik. Bizim bu sevinci yaşamağımızın əsas səbəbkarı onlardır. Bu gözəl günləri bizə onlar bəxş etdilər. Buradan çıxanda 30 yaşım vardı, 64 yaşımda geri qayıtdım. 34 il, əlbəttə ki, insan ömründə az müddət deyil. Çox əziyyət çəkdik. Beyləqan, İmişli, Kürdəmir, Bakıda yaşadıq, daha sonra yenidən İmişlidə məskunlaşdıq. Amma yenə də doğma kəndimizi arzuladıq. Burada yaradılan şərait olduqca gözəldir. Yaşamaq üçün nə lazımdırsa hamısı yaradılıb”.
Şükürbəyli kəndinə qayıdan sakinlərin çöhrəsindəki sevinc Qarabağ və Şərqi Zəngəzurun dirçəlişinin ən bariz nümunəsidir. Dövlətin diqqət və qayğısı sayəsində qısa müddətdə modern infrastruktura qovuşan bu kənd təkcə yaşayış məntəqəsi deyil, həm də milli qürurumuzun və tarixi ədalətin bərpasının rəmzinə çevrilib. Murad, Savalan kişi və yüzlərlə digər sakinin timsalında Şükürbəyliyə qayıdan həyat bu torpaqların əbədi sahiblərinə qovuşduğunu bir daha təsdiqləyir. Qarşıdakı illərdə kəndin iqtisadi potensialının, xüsusilə ənənəvi təsərrüfat sahələrinin bərpası ilə Şükürbəyli nəinki Cəbrayılın, eləcə də regionun ən abad və dinamik inkişaf edən yaşayış məskənlərindən biri olacaq.
Müxbir-Aydın Yavərzadə
Bölmənin digər xəbərləri
