Quba yerli və xarici qonaqları qarşılamağa hazırdır - Qəçrəşdən reportaj VİDEO
Quba, 16 may, AZƏRTAC
Zəngin təbiəti və qədim mədəniyyəti ilə seçilən Quba yerli və xarici qonaqları qarşılamağa hazırdır. Əksər istirahət mərkəzlərində yeni turizm mövsümünə hazırlıq işləri başa çatıb.
AZƏRTAC-ın bölgə müxbiri xəbər verir ki, ölkəmizin şimal bölgəsinə gələn turistlər arasında ən populyar səyahət istiqaməti Quba-Xınalıq turizm marşrutudur.
Əsrarəngiz təbiət mənzərələrinə malik Qəçrəş meşələri, dağ yamacı boyunca axan bolsulu Qudyalçay, Qafqaz dağlarının sıldırım qayalıqları arasındakı füsunkar gözəlliklər və unikallığı ilə bütün dünyada tanınan qədim Xınalıq kəndi turistləri bura cəlb edir. Bununla yanaşı, Quba rayonunun Azərbaycan paytaxtına məsafə baxımından yaxın region olması da turist axınında böyük rol oynayır.
Quba-Xınalıq istiqamətinin ilk dayanacağı - Qəçrəş meşəsidir. Qəçrəş kəndi rayon mərkəzindən təxminən 10 kilometr məsafədə yerləşir. Bu kəndin girişindəki meşə zolağı ölkəmizdə məşhurdur. Turistlər həm yay aylarında, həm də qışda Qəçrəş meşəsinin mənzərəsini izləməkdən zövq alırlar.
Yerli turist Elgün İsmayılov hər il yay aylarında Qubaya dincəlməyə gəldiklərini bildirib: “Bakı şəhərində yaşayıram. Havalar isindikcə adam istəyir ki, təbiət qoynunda dincəlsin. Qubanın təbiəti isə möhtəşəmdir. Övladlarımızla birlikdə gəlmişik. Dünyada məşhur türk tarixçi İlbər Ortaylı tövsiyyə edir ki, mebel, geyim dükanlarını gəzincə uşaqlarınızın əlindən tutub səyahət edin ki, dünyagörüşünüz artsın. Mən də çalışıram bacardıqca həm ölkəmizin həm də dünyanın görməli yerlərini gəzim. Qubaya gələndə insan sərinliyi, təmizliyi və sakitliyi hiss edir”.
Quba-Xınalıq turizm marşrutu üzərində ən çox istirahət mərkəzləri də məhz Qəçrəş kəndi ərazisindədir. Qəçrəş və ətraf ərazilərdə dincəlmək üçün hər büdcəyə uyğun münasib turizm obyekti tapmaq mümkündür.
“Qubaya beşinci gəlişim olsa da kollektivlə ilk səfərimdir. Həmişə ailə ilə gəlmişəm. Buranın havası, təbiəti, sıx meşələrini çox bəyənirəm. Həm də paytaxta yaxın olduğuna görə gəlməyə dəyər”, - deyə yerli turistlərdən Xəyalə Mirzəxanlı söyləyib.
Quba-Xınalıq turizm marşrutu ilə səyahət zamanı yolun bir hissəsi gur axan Qudyalçayın sahili ilə dağ yamacı boyunca uzanır. Xınalıq kəndinə yollanan turistlərin əksəriyyəti bu möhtəşəm təbiət mənzərələrinə biganə qala bilmir. Onlar yolboyu dəfələrlə avtomobillərini saxlayır, füsunkar təbiətdən zövq alır, video, fotoşəkillər çəkirlər.
Azərbaycana ilk dəfə gələn türkiyəli turist Camal Sayar bildirir ki, burada onlara doğma münasibət var: “Bura bir türkdilli dövlət olduğu üçün səyahət etmək qərarı verdik. Eyni dildə danışırıq. Bir-birimizi gözəl anlayırıq. Buranın insanları çox istiqanlıdır. Bakı çox modern bir şəhərdir. Bir azdan Şahdağa gedəcəyik. Burada dadlı qutablardan yedik. Hələ gəzəcək çox yerimiz var. Bu gün Azərbaycanda ilk günümüzdür. Birbaşa təbiət qoynuna düşmək çox gözəldir. Burada özümüzü elə ölkəmizdə olduğumuz kimi hiss etdik”.
Azərbaycanın ev sahibliyi edəcəyi BMT-nin Ümumdünya Şəhərsalma Forumunun 13-cü Sessiyası (WUF13) ilə əlaqədar ölkəmizə gələcək çoxsaylı xarici turistlərin paytaxtla yanaşı bölgələrimizi də yaxından tanımaq imkanı olacaq. Qubada yerləşən turizm mərkəzləri əcnəbi qonaqları qarşılamağa hazırdır.
“Bizim istirahət mərkəzi füsunkar təbiətə malik Qəçrəş meşəsində yerləşir. Yeni mövsümə tam hazırıq. Bizim yerli, həm də xaricdən gələn turistləri qarşılamaq, onları xoş təəssüratlarla yola salmaq üçün kifayət qədər təcrübəmiz var. Xidmət sahəsində ərəb, rus, ingilis dillərini bilən əməkdaşlarımız çalışır. Qonaqlara ləziz milli yeməklər, Quba, ləzgi, tat mətbəxinin dadlı çeşidlərini təqdim edirik. Burada qalmaq üçün koteclərimiz, “A-frame” evlərimiz var. Günü 80 manatdan başlayan qiymətlərlə bizim istirahət mərkəzində meşə, çay mənzərəli yerlərdə qalmaq və dincəlmək olar. Yerli qonağımıza da, xaricidən gələnə də böyük hörmətimiz var”- deyə istirahət mərkəzinin inzibatçısı Tahir Muradov bildirib.
Qubaya gələn turistlərin istirahət edə biləcəyi 5 əsas turizm marşrutu var.
Quba-Xınalıq istiqamətdə səyahət edənlər Xınalıq kəndindəki dağ icmasının unikal mədəniyyəti, həyat tərzi ilə yaxından tanış ola bilərlər. Bu marşrutun üzərində yerləşən Cümə məscidi, Günbəzli hamam (Çuxur hamam), Quba Tarix-Diyarşünaslıq Muzeyi, Tağlı körpü, Qırmızı qəsəbə, Quba Soyqırımı Memorial Kompleksi, Qəçrəş meşəsi, Minarə (Küsnətqazma kəndi), Qrız körpüsü, Xınalıq Tarix-Etnoqrafiya Muzeyi, Xınalıq Atəşgahı (xüsusi icazə ilə) turistlər üçün diqqət çəkən yerlərdir.
Quba-Xanagah turizm marşrutunun üzərində yerləşən və turistlər üçün diqqət çəkən yerlərə A.Bakıxanovun ev-muzeyi, Cümə məscidi (Püstəqasım kəndi), Xanəgah qəbiristanlığı, Şahdağ Milli Parkı, Girdah şəlaləsi, Xanagah şəlalələri, Söhüb qalası, Yeddilər qalası, Qaraçay kanyonu və başqa görməli yerlər aiddir.
Turistlərin tez-tez səyahət etdiyi Quba-Qrız turizm marşrutunun ümumi uzunluğu 40 kilometrdir. Qafqaz Albaniyasının izlərini daşıyan Qrız kəndinin tarixi, mədəniyyəti və təbiət imkanları marşrutu unikal edir. Ekoturizmi təcrübə etmək üçün Qrız kəndi ən doğru seçimdir.
Quba-Afurca turizm marşrutunun əsas özəlliyi Afurca şəlaləsi, Təngəaltı kəndinin unikal təbiətidir. Bu turizm marşrutunun üzərində yerləşən Birinci Nügədi kənd məscidi, Çənlibel gölü, Afurca şəlaləsi, Təngəaltı kanyonu (Təngə dərəsi kanyonu), Qaçaq Mayıl mağarası əsas diqqət çəkən yerlədir.
Quba-Qırmızı qəsəbə turizm marşrutu ilə səyahət zamanı Qırmızı qəsəbədə yaşayan dağ yəhudilərinin tarixi, mədəniyyəti, mətbəxi ilə yaxından tanış olmaq olar.
Müxbir - Elxan Yusifli
Bölmənin digər xəbərləri
