"Xocalı harayı" kitabının təqdimatı olub VİDEO
Bakı, 17 iyun, AZƏRTAC
Azərbaycan Tibb Universitetinin (ATU) İnsan anatomiyası və tibbi terminologiya kafedrasının professoru, "Xocalı Soyqırımını Tanıtma" İctimai Birliyinin Ağsaqqallar Şurasının sədri, Əməkdar müəllim Mübariz Allahverdiyevin yeni çapdan çıxmış "Xocalı harayı" kitabının təqdimat mərasimi keçirilib.
AZƏRTAC xəbər verir ki, Dövlət Himninin səsləndirilməsi ilə başlanan tədbirdə Vətənin azadlığı uğrunda şəhid olanların xatirəsi bir dəqiqəlik sükutla yad edilib.
Əməkdar həkim Taryel Eyvazov “Xocalı harayı” kitabının əhəmiyyətinə toxunub. O, əsərin ərsəyə gəlməsində əziyyəti olan hər kəsə təşəkkür edib.
Daha sonra M. Allahverdiyevin həkimlik fəaliyyətinə həsr olunmuş videoçarx nümayiş etdirilib.
Tədbirdə çıxış edən ATU-nun Oftalmologiya kafedrasının müdiri, professor Paşa Qəlbinur bildirib ki, Xocalı soyqırımını törədənlər insanlığa sığmayan hərəkətlər ediblər. O, eyni zamanda deyib ki, Xocalı faciəsi zamanı törədilən vəhşiliklərə baxmayaraq, Azərbaycan xalqı düşmənin qarşısında baş əyməyib, işğal altında olan torpaqlar azad edilib.
Milli Qəhrəman Şirin Mirzəyevin həyat yoldaşı Flora Qasımova Xocalını “Sağalmaz yara” adlandırıb. O bildirib ki, gənc nəsil bu faciəni unutmamalıdır. “Bununla bağlı tədbirlər və kitablar bu işə töhfə verə bilər”, - deyə o diqqətə çatdırıb.
Azərbaycan Jurnalistlər Birliyinin üzvü, yazıçı-jurnalist Mövsümağa Ədalətoğlu "Xocalı harayı" kitabının çapı ilə əlaqədar M. Allahverdiyevi təbrik edib. Bu cür kitabların nəşrinin və yayılmasının vacibliyini qeyd edən yazıçı-jurnalist müəllifə yeni yaradıcılıq uğurları arzulayıb.
Milli Qəhrəman Asif Məhərrəmovun qardaşı Ədalət Məhərrəmov və digər natiqlər də Xocalı soyqırımının tanıdılmasında bu cür kitabların əhəmiyyətli olduğunu vurğulayıblar. Xocalıda törədilən vəhşiliklərin tanıdılmasında belə əsərlərin vacib olduğunu bildiriblər.
Sonda çıxış edən professor M.Allahverdiyev vurğulayıb ki, onda "Xocalı harayı" kitabını yazmaq fikri Prezident, Müzəffər Ali Baş Komandan İlham Əliyevin rəhbərliyi ilə işğal altında olan torpaqlar azad edildikdən sonra yaranıb. “Bu kitabda Xocalı soyqırımı zamanı yaşanan vəhşəti qələmimlə və poetik dillə dilə gətirdim”, - deyə o diqqətə çatdırıb.
Bölmənin digər xəbərləri
