Bakı, 5 aprel (AZƏRTAC, Səxavət Quliyev). Aprelin 5-də 2014-cü ildə Bakıda təşkil olunacaq bədii gimnastika üzrə XXX Avropa çempionatına hazırlıqla bağlı brifinq keçirilmişdir.

AZƏRTAC xəbər verir ki, “Fairmont-Baku” mehmanxanasında təşkil olunmuş tədbirdə əvvəlcə Avropa çempionatının videoçarxı nümayiş olunmuşdur.

Yarışa hazırlığın yüksək səviyyədə davam etdiyini diqqətə çatdıran Azərbaycan Gimnastika Federasiyasının və Avropa çempionatının Təşkilat Komitəsinin vitse-prezidenti Altay Həsənov Azərbaycanın bu mötəbər yarışa müvəffəqiyyətlə ev sahibliyi edəcəyinə inandığını bildirmişdir.

Qeyd etmişdir ki, qitə birinciliyi iyunun 13-dən 15-dək yeni inşa olunmuş Milli Gimnastika Arenasında keçiriləcəkdir. Çempionat zamanı arena iki hissəyə bölünəcəkdir. Arenanın bir tərəfində 1, ikinci tərəfində isə 11 xalça qurulacaqdır. Birinci hissədə yarışlar, digərində isə məşqlər keçiriləcəkdir.

A.Həsənov bildirmişdir ki, qitə birinciliyində 33 ölkədən 258 gimnast 8 dəst medal uğrunda mübarizə aparacaqdır. Bakıda təşkil olunacaq çempionatda Avropanın ən güclü gimnastları yarışacaqlar. Azərbaycan gimnastlarının isə yerli azarkeşlərə böyük ehtiyacı vardır. Ümid edirəm ki, idmansevərlər yarışda qızlarımıza dəstək olacaqlar.

Qarşıda daha məsuliyyətli turnirlərin olacağını diqqətə çatdıran vitse-prezident gələn il ölkəmizdə təşkil ediləcək birinci Avropa Oyunlarında gimnastikanın altı növü üzrə yarışların keçiriləcəyini vurğulamışdır. Qeyd etmişdir ki, hazırda qadın idman gimnastikası və batut idman növlərinin ölkəmizdə inkişaf etdirilməsi istiqamətində mühüm addımlar atılmışdır.

Ölkəmizdə idmana göstərilən dövlət qayğısını yüksək qiymətləndirən Avropa Gimnastika İttifaqının Bədii Gimnastika üzrə Texniki Komitəsinin rəhbəri Hayde Bruneder yeni istifadəyə verilmiş Milli Gimnastika Arenasının möhtəşəmliyindən danışmışdır.

H.Bruneder qeyd etmişdir ki, yunior gimnastların yarışlarında müəyyən yeniliklər tətbiq olunacaqdır. Gimnastlar komanda yarışlarında 4 deyil, 8 çıxış edəcəklər. Sonda altı ən yaxşı çıxışın nəticələri hesablanacaqdır. Şəxsi yarışlarda isə Avropanın 20 ən güclü gimnastı birincilik uğrunda yarışacaqdır.

Əvvəllər də Bakıda bədii gimnastika üzrə Avropa çempionatının keçirildiyini diqqətə çatdıran qonaq budəfəki yarışın da möhtəşəm olacağına və idmansevərlərdə xoş təəssürat yaradacağına ümid etdiyini bildirmişdir. Vurğulamışdır ki, gələn il Azərbaycanda ilk Avropa Oyunlarının təşkil olunması isə bu ölkənin çox böyük uğurudur. XXX Avropa çempionatının məhz Bakıda təşkil olunması da əlamətdar hadisədir. Çünki qrup yarışlarında ilk beş yeri tutacaq idmançılar birinci Avropa Oyunlarında iştirak etmək hüququ qazanacaqlar. Şəxsi yarışlarda mübarizə aparacaq gimnastlar isə birbaşa Avropa Oyunlarının iştirakçısı olacaqlar.

Sonra gimnastların çıxış ardıcıllığı barədə keçirilmiş püşkatma barəsində məlumat verən H.Bruneder Azərbaycanın yunior gimnastlarının 9-cu, böyüklərin isə 3-cü nömrə altında çıxış edəcəklərini diqqətə çatdırmışdır.

Azərbaycan milli komandasının baş məşqçisi Marina Vasileva çempionatda iştirak edəcək gimnastlarımız barədə məlumat vermişdir.

Sonra Avropa çempionatının yeni saytı təqdim olunmuşdur. Üç dildə fəaliyyət göstərən www.baku2014.agf.az saytında çempionat haqqında ətraflı məlumat yerləşdirilmişdir.

Məlumat verilmişdir ki, çempionatın biletləri aprelin 20-dən satışa çıxarılacaqdır. Biletləri şəhərin satış kassalarından, həmçinin Milli Gimnastika Arenasından və rəsmi saytdan əldə etmək mümkündür.