82 YAŞLI AMERİKALI QADIN HARVARD UNİVERSİTETİNİN DİPLOMUNU ALMIŞDIR

13.06.2006 [18:20]
Çap et
A⁺ A^-

AZƏRTAC “Novosti” agentliyinə istinadla xəbər verir ki, 82 yaşlı amerikalı qadın Betti MakNil Harvard Universitetinin diplomunu almışdır. Universitetin nümayəndəsi Linda Kross agentliyə bildirmişdir ki, xanım MakNilə incəsənət bakalavrı diplomu, akademik nailiyyətlərə və məqsədyönlüyə görə mükafat verilmişdir.

Onun sözlərinə görə, xanım MakNil 25 il Universitetin Sağlamlıq Mərkəzinin inzibati şöbəsində işləmişdir. O, 20 il universitetdə məşğələlərə getmiş, 9 ilə incəsənət bakalavrı dərəcəsi almışdır.

Harvard Universitetinin qocaman məzunu jurnalistlərə demişdir: “Mən qrupda heç vaxt özümü yaşlı saymamışam. Qarşıma məqsəd qoymuşdum ki, 83 yaşım tamam olmamış elmi dərəcə alacağam”.

Betti MakNil özünü astagəl sayır və əsərini də astagəlliyə həsr etmişdir.

Harvard Universitetinin tarixində ən yaşlı məzun isə 10 il əvvəl bakalavr diplomu almış 89 yaşlı Meri Fazanodur.