Orta əsr Ağsu şəhər Arxeoloji Turizm Kompleksində Ümumdünya Arxeologiya Günü qeyd olunub VİDEO
Ağsu, 29 iyul, Adil Ağayev, AZƏRTAC
MİRAS Mədəni İrsin Öyrənilməsinə Kömək İctimai Birliyinin təşkilatçılığı ilə iyulun 29-da Orta əsr Ağsu şəhər Arxeoloji Turizm Kompleksində Ümumdünya Arxeologiya Günü təntənəli surətdə qeyd olunub.
AZƏRTAC xəbər verir ki, tədbirdə arxeoloqlar, etnoqraflar, epiqraflar, sənətşünaslar, Bakı, Ağsu, Şamaxı, İsmayıllıdan olan mədəni irs könüllüləri, habelə yerli sakinlər iştirak ediblər.
Tədbirdə əvvəlcə Orta əsr Ağsu şəhər Arxeoloji Turizm Kompleksindəki Cümə məscidində 2013-2015-ci illərdə Mehrəvan qalasında aparılan arxeoloji qazıntıların nəticələrini əks etdirən “İlk orta əsrlərdə şəhər mədəniyyəti - Mehrəvan qalası” sərgisinin açılış mərasimi olub. Tarix üzrə fəlsəfə doktoru Fariz Xəlilli sərgidə nümayiş etdirilən zəngin maddi-mədəniyyət nümunələri - tunc bəzək əşyaları, dəmir alətlər, əqiq möhürlər, Roma, Bizans və Sasani sikkələri, nərd daşları və zərləri, sümük, daş, şüşə əşyalar, saxsı təknə və sair barədə ətraflı məlumat verib. Vurğulanıb ki, sərgi bir il ərzində Orta əsr şəhər qalıqlarında aşkar edilən Cümə məscidində nümayiş olunacaq.
Sonra Ağsu məktəblilərinin ifasında yazıçı Arzu Soltanın ssenarisi əsasında yazılan “Sən də bizə qoşul” birpərdəli tamaşa nümayiş etdirilib. Tamaşa uşaqları arxeoloji tədqiqatlara və axtarışlara həvəsləndirmək baxımından çox maraqla qarşılanıb. Səhnəcik Orta əsr Ağsu şəhərinin baş meydanında nümayiş olunub. Meydanda İsmayıllı Dövlət Humanitar və Texnologiya Kollecinin tələbələrinin ifasında milli rəqslər oynanılıb, MİRAS musiqi qrupunun muğam dəstgahı səsləndirilib.
Tədbir çərçivəsində Orta əsr Ağsu şəhəri Arxeoloji Turizm Kompleksinin konfrans zalında professor Kübra Əliyeva, epiqraf Həbibə Əliyeva və arxeoloq Elmira Abbasovanın iştirakı ilə “Saxsıdan tətbiqi sənətə: naxışlar nədən danışır?” mövzusunda seminar keçirilib. Seminarda Azərbaycanın zəngin sənət tarixi, naxışlar aləminin müxtəlifliyi və varislik yolu ilə bu günə çatması ətrafında müzakirələr aparılıb, suallar cavablandırılıb.
Sonra Ağsu Tarix-Diyarşünaslıq Muzeyinin, Ağsu Mərkəzi Kitabxanasının tətbiqi sənət nümunələri və yeni nəşrlərdən ibarət sərgiləri nümayiş etdirilib.
MİRAS Mədəni İrsin Öyrənilməsinə Kömək İctimai Birliyinin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirdiyi “Kənd həyat tərzinin inkişafında qadınların rolu” layihəsi çərçivəsində Gəgəli, Bico və Qəşəd qadınlarının əl işləri də sərgiyə çıxarılıb, bəzi əl işlərinin hərracı keçirilib.
Rəssam Vüqar Qurbanov tədbir boyunca çəkdiyi etüdləri iştirakçılara hədiyyə edib.
Bölmənin digər xəbərləri
