Azərbaycan Nar İstehsalçıları və İxracatçıları Assosiasiyası yeni saytının təqdimatını keçirib
Bakı, 13 mart, Sevda Cəfərova, AZƏRTAC
Son illər ölkəmizdə qeyri-neft sektorunun, xüsusilə də aqrar bölmənin inkişafına böyük diqqət ayrılır. Bununla bağlı çoxsaylı tədbirlər həyata keçirilir. Dövlətimizin başçısı İlham Əliyevin tapşırıq və tövsiyələrinin uğurlu icrası meyvəçiliyin inkişafına münbit şərait yaratmaqla, ölkədə ərzaq bolluğuna səbəb olub.
AZƏRTAC xəbər verir ki, bu fikirləri Azərbaycan Nar İstehsalçıları və İxracatçıları Assosiasiyasının saytının təqdimat mərasimində assosiasiyanın sədri Fərhad Qaraşov bildirib.
“Ölkə Prezidentinin 2015-ci ili “Kənd təsərrüfatı ili” elan etməsi ilə aqrar sahənin inkişafında yeni mərhələ başlandı. Həyata keçirilən tədbirlərlə yanaşı müxtəlif assosiasiyaların yaranması prosesi başladı. Məhz Azərbaycan Nar İstehsalçıları və İxracatçıları Assosiasiyası da bunlardan biridir”, - deyə Fərhad Qaraşov bildirib.
F.Qaraşov məlumat verib ki, assosiasiya 2016-cı ilin oktyabr ayından fəaliyyətə başlayıb. Assosiasiya narçılığın inkişaf etdirilməsi, bu məhsulun xarici bazarlara geniş şəkildə çıxarılması və ixrac missiyasını yeni bazarlar hesabına genişləndirilməsi məqsədilə apardığı işlər iqtisadiyyatımızın inkişafına böyük töhfələr verir.
Rəqabətqabiliyyətli və ixracyönümlü məhsul istehsalının artırılması, bu sahədə ixracın genişləndirilməsi, Azərbaycan məhsullarının xarici bazarlarda “Made in Azerbaijan” brendi altında tanıdılması, beynəlxalq sərgilərdə yerli məhsullarımızın vahid ölkə stendində nümayiş olunması, üzv olan sahibkarlara ixrac təşviqi ödənilməsinə köməklik göstərilməsi, ixracatçılara məsləhət xidməti göstərilməsi məqsədilə yaradılıb.
Milli Məclisin iqtisadi siyasət, sənaye və sahibkarlıq komitəsinin sədri, akademik Ziyad Səmədzadə bildirib ki, Azərbaycanın çox səfalı təbiəti, çox zəngin təbii resursları və ekoloji cəhətdən çox təbii olan məhsulları var və belə bir assosiasiyanın təşkili heç şübhəsiz ki, müstəqil Azərbaycanın tarixində önəmli bir hadisə kimi qiymətləndirilə bilər. Bu cür assosiasiyanın yaradılması, onun ətrafında kiçik biznesin və sahibkarlığın cəmləşməsi və birgə iş aparmaları Azərbaycan iqtisadiyyatı üçün yeni imkanlar açacaq.
Tədbirdə ümummilli lider Heydər Əliyevin anadan olmasının 95 illiyinə həsr olunmuş videoçarx nümayiş olunub. Yarandığı gündən bir sıra uğurlara imza atan assosiasiya yeni bir uğurunu, web-saytının yenilənmiş versiyasını ictimaiyyətə təqdim edib.
Vurğulanıb ki, sayt Azərbaycan narının təbliğatında, bu sektorun inkişafına töhfələrini verəcək. Yüksək peşəkarlıqla hazırlanmış saytda Azərbaycan tarixində, mədəniyyətində, ədəbiyyatında, musiqisində, folklorunda, mətbəxində nar haqqında fotoşəkillər, videoroliklər, musiqilər, şeirlər, nar meyvəsindən istifadə olunan yeməklərin şəkilləri yerləşdirilib.
Assosiasiya üzvlüyünə qəbul üçün online müraciət və online köməklik xidmətlərindən yararlanmaq imkanları mövcuddur. Həmçinin sahibkarlar sayt vasitəsilə logistika, sertifikatlaşdırma, ixrac sənədləri və bu kimi xidmətlərdən yardım ala bilərlər.
Daha sonra assosiasiyanın fəaliyyətində yaradıcı xidmətlərinə görə mükafatlandırma mərasimi keçirilib.
Bölmənin digər xəbərləri
