“Əbədi dostluq haqqında Müqavilə”nin imzalanması Türk dünyasında yeni mərhələnin əsasını qoyur - ŞƏRH
Bakı, 29 avqust, AZƏRTAC
“Azərbaycan Respublikası ilə Özbəkistan Respublikası arasında əbədi dostluq haqqında Müqavilə”nin imzalanması türk dövlətləri arasında münasibətlər baxımından mühüm yenilikdir. Prezident İlham Əliyevin son illərdə Mərkəzi Asiya dövlətləri ilə apardığı ardıcıl və məqsədyönlü siyasət Türk Dövlətləri Təşkilatının daha da gücləndirilməsinə yönəlib.
Bu fikirləri AZƏRTAC-a açıqlamasında politoloq Elşad Həsənov deyib. Politoloq bildirib ki, Azərbaycan–Özbəkistan münasibətlərinin hazırkı səviyyəsi yalnız siyasi sənədlərlə məhdudlaşmır. Səfər zamanı yeni müqavilələrin imzalanması, qardaşlaşmış şəhərlərin sayının artırılması, Azərbaycan və Özbəkistan prezidentlərinin qarşılıqlı olaraq təltif edilməsi iki ölkə liderləri arasında formalaşmış yüksək siyasi etimadın göstəricisidir.
“Son illərdə qarşılıqlı turist səfərlərinin artması, xalqların bir-birinin ölkəsinə marağının yüksəlməsi, mədəniyyət günlərinin keçirilməsi Azərbaycan ilə Özbəkistan arasında tarixi və mənəvi bağların daha da gücləndiyini göstərir. Uzun illər sovet siyasəti türk xalqlarını bir-birindən ayrı salmağa çalışsa da, bu gün biz tarixi yaddaşımıza, ortaq köklərimizə və mədəni bağlarımıza qayıdırıq. Azərbaycan ilə Özbəkistan arasındakı münasibətlərin sürətli inkişafı bunun bariz nümunələrindən biridir”, – deyə politoloq vurğulayıb.
E.Həsənov qeyd edib ki, əbədi dostluq Müqaviləsinin imzalanması gələcəkdə digər türk dövlətləri ilə də daha dərin və uzunmüddətli strateji münasibətlərin formalaşması üçün nümunə yarada bilər.
“Müasir beynəlxalq münasibətlər sistemində geosiyasi rəqabətin və qarşıdurmaların artdığı bir şəraitdə türk dövlətlərinin daha sıx əməkdaşlığı xüsusi əhəmiyyət daşıyır. Bu birlik yalnız siyasi həmrəyliklə məhdudlaşmamalıdır. İqtisadiyyat, nəqliyyat, enerji, təhlükəsizlik və müdafiə sahələrində əməkdaşlığın dərinləşdirilməsi Türk Dövlətləri Təşkilatının real güc mərkəzinə çevrilməsi üçün zəmin yarada bilər. Bu prosesdə Azərbaycan mühüm təşəbbüslərlə çıxış edən dövlətlərdən biridir”, – deyə o bildirib.
Politoloq Özbəkistan Prezidenti Şavkat Mirziyoyevin Xəzər dənizində Azərbaycan və Özbəkistan arasında birgə donanmanın yaradılması ideyasını irəli sürməsini də mühüm təşəbbüs kimi qiymətləndirib: “Bu təklif Özbəkistanın iqtisadi və demoqrafik potensialı fonunda xüsusi əhəmiyyət daşıyır.
Özbəkistan əhalisinin sayı 40 milyona yaxınlaşıb. Gənc əhalinin artması ölkənin əmək və insan resurslarını, istehlak bazarını və iqtisadi potensialını genişləndirir. Bu potensialın Azərbaycan üzərindən dünya bazarlarına çıxarılması isə ikitərəfli əməkdaşlığın geoiqtisadi əhəmiyyətini daha da artırır.
Azərbaycanın əsas məqsədlərindən biri Mərkəzi Asiya ölkələrinin, o cümlədən Özbəkistanın məhsullarının Orta Dəhliz vasitəsilə Azərbaycan üzərindən dünya bazarlarına çıxışını genişləndirməkdir. Bu proses Zəngəzur dəhlizinin reallaşması ilə daha böyük imkanlar qazana bilər. Zəngəzur dəhlizi Orta Dəhlizin mühüm seqmentlərindən biri kimi Mərkəzi Asiyadan gələn yüklərin Türkiyə və Avropa istiqamətində daşınması üçün əlavə və daha çevik imkanlar yaradacaq”.
Müsahibimiz bildirib ki, Azərbaycan artıq bu perspektivə uyğun olaraq nəqliyyat infrastrukturunun inkişaf etdirilməsi istiqamətində mühüm işlər həyata keçirir. Bakıdan Ermənistan sərhədinədək dəmir yolunun modernləşdirilməsi, Naxçıvan ərazisində dəmir yolu infrastrukturunun yenilənməsi və Zəngəzur istiqamətində nəqliyyat bağlantısının yaradılması Orta Dəhlizin gələcək imkanlarının genişləndirilməsi baxımından mühüm əhəmiyyət daşıyır.
“Azərbaycan Prezidentinin Mərkəzi Asiya istiqamətində həyata keçirdiyi siyasətin nəticələrini konkret layihələrdə və yeni əməkdaşlıq mexanizmlərində görürük. Əbədi dostluq Müqaviləsi, Orta Dəhliz, Zəngəzur bağlantısı, Xəzərdə nəqliyyat imkanlarının genişləndirilməsi və Türk Dövlətləri Təşkilatı çərçivəsində əməkdaşlığın dərinləşdirilməsi bir-birini tamamlayan proseslərdir”, – deyə Elşad Həsənov vurğulayıb.
Müxbir - Səbinə Əlizadə
Bölmənin digər xəbərləri
