Türk Dövlətləri Siyasətinə Dəstək Fondu qırğız dilində kitablar nəşr etdirib
Bakı, 29 avqust, AZƏRTAC
Şanxay Əməkdaşlıq Təşkilatının Bişkekdə keçiriləcək sammiti yalnız mühüm beynəlxalq siyasi hadisə deyil. Bu sammit həm də dövlətlərin və xalqların bir araya gəlməsi, bir-birini dinləməsi və qarşılıqlı hörmətin, tarixi yaddaşın, mədəni dialoqun əhəmiyyətini bir daha vurğulaması üçün mühüm imkandır.
Türk Dövlətləri Siyasətinə Dəstək Fondu Bişkekdə keçiriləcək sammit münasibətilə qırğız dilində iki kitab nəşrə hazırlayıb.
Fonddan AZƏRTAC-a bildirilib ki, kitablardan biri “Osman imperiyası və Türk Cümhuriyyəti” adlanır. Kitab Osmanlı imperiyasının və Türkiyə Cümhuriyyətinin tarixinə, türk xalqının tarixi inkişafının və dövlətçilik yolunun mühüm mərhələlərinə həsr olunub.
“Heydər Əliyev 101. Xalqa həsr olunmuş ömrün anları” kitabı isə Azərbaycan xalqının Ümummilli Lideri Heydər Əliyevin həyat yoluna, dövlətçilik fəaliyyətinə və tarixi irsinə həsr olunub.
Hər iki kitab Bişkekdə qırğız dilinə tərcümə edilərək nəşr olunub.
Türk Dövlətləri Siyasətinə Dəstək Fondunun sədri Nüsrət Məmmədov deyib: “Mənim üçün əlamətdar olan məqam budur ki, bu kitablar məhz Qırğızıstanda və qırğız dilində hazırlanıb.
Qırğızıstan Türk dünyasının ayrılmaz hissəsidir. Bizi yalnız qohum dillər və mədəni yaxınlıq birləşdirmir. Bizi ortaq tarixi yaddaş, ənənələr, mənəvi dəyərlər və qarşılıqlı hörmətə əsaslanan dərin insani bağlar birləşdirir.
Türkiyə və Azərbaycan Qırğızıstanın qardaş türk dövlətləri ilə münasibətlərində xüsusi yer tutur. Buna görə də biz sammit üçün sadəcə formal bir hədiyyə deyil, özündə mədəni, tarixi və insani məna daşıyan bir töhfə hazırlamaq istədik.
Kitab xüsusi bir hədiyyədir. Onun zaman həddi yoxdur. İllər sonra belə onu açıb tarixə, insanların düşüncələrinə, talelərinə və irsinə yenidən nəzər salmaq mümkündür”.
Bölmənin digər xəbərləri
