® Qarabağda Milli Biznesin İnkişafı Forumunun Xankəndi xüsusi sessiyası
Mayın 13-də “Grand CEO Tour” proqramı çərçivəsində “Caspian Energy Club”a üzv olan şirkətlər Qarabağda “#bizislahatlarahazırıq” şüarı altında keçirilən Milli Biznesin İnkişafı Forumunun Xankəndi xüsusi sessiyasında iştirak ediblər. Bu barədə “Caspian Energy Club”ın sədri və qrupun baş icraçı direktoru Telman Əliyev məlumat verib.
“Caspian Energy Club” və Azərbaycan Milli Biznes Assosiasiyasının (MİLLİ.BİZ) birgə təşkilatçılığı, “Accurate Az” şirkətinin baş sponsorluğu ilə baş tutan forum mövcud sual və təkliflərin müzakirəsinə, regionun biznes və investisiya mühitinin inkişaf perspektivlərinə həsr olunub. Tədbirin açılış mərasimində Telman Əliyev çıxış edərək Qarabağın ölkənin iqtisadi gələcəyində oynadığı strateji roldan, biznes ictimaiyyətinin bu prosesdə fəal iştirakının əhəmiyyətindən danışıb.
Daha sonra Xankəndi şəhəri, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubov, Qarabağ Universitetinin rektoru Şahin Bayramov və İqtisadiyyat Nazirliyi yanında Dövlət Vergi Xidmətinin Qarabağ Ərazi Vergilər Baş İdarəsinin rəisi Ələkbər Məmmədov çıxış edərək regionda formalaşan yeni iqtisadi reallıqlar, sahibkarlar üçün yaradılan imkanlar və dövlət dəstəyi mexanizmləri barədə ətraflı məlumat veriblər.
“Qarabağ və Şərqi Zəngəzur iqtisadi rayonlarında özəl sektor üçün tətbiq edilən geniş güzəşt mexanizmləri əlverişli biznes mühiti formalaşdırıb. Regionda fəaliyyət göstərən rezidentlər üçün mənfəət, gəlir, əmlak, torpaq və sadələşdirilmiş vergilər üzrə güzəştlər tətbiq olunur. Eyni zamanda, istehsal və xidmət fəaliyyəti üçün idxal edilən avadanlıq və xammala görə ƏDV və gömrük rüsumlarından azadolmalar nəzərdə tutulur”, - deyə Elçin Yusubov bildirib.
Onun sözlərinə görə, Azərbaycan Biznesin İnkişafı Fondu tərəfindən regionda fəaliyyət göstərən sahibkarlara dövlət zəmanətli kreditlər və kredit faizlərinin subsidiyalaşdırılması mexanizmləri tətbiq olunur.
Elçin Yusubov bildirib ki, Qarabağda sənaye inkişafı üçün yeni mərhələ açılır. Belə ki, “AzerGold” Qapalı Səhmdar Cəmiyyəti Ağdərə rayonundakı mis yataqlarının istifadəsi ilə bağlı yeni istehsal sahələrinin yaradılması üçün işləri davam etdirir.
Sessiya çərçivəsində keçirilən müzakirələr və sual-cavab hissəsində iştirakçılar regionun iqtisadi inkişafı, investisiya imkanları, təhsil və biznes əməkdaşlığı istiqamətində fikir mübadiləsi aparıblar. Müzakirələrdə, həmçinin “Caspian Energy Club”ın Qarabağ və Şərqi Zəngəzur iqtisadi rayonları üzrə nümayəndəliyinin rəhbəri İlkin Abuşov iştirak edib.
Çıxışı zamanı İlkin Abuşov vurğulayıb ki, Qarabağ və Şərqi Zəngəzur bölgələri yaxın illərdə Azərbaycanın ən mühüm iqtisadi və investisiya mərkəzlərindən birinə çevriləcək: “Regionda sahibkarların fəaliyyətinin genişləndirilməsi, investorlarla yerli biznes nümayəndələri arasında effektiv platformanın formalaşdırılması, bölgədə beynəlxalq biznes forumlarının, networking tədbirlərinin, investisiya missiyalarının təşkili, eləcə də gənc sahibkarların və startapların dəstəklənməsi fəaliyyətimizin əsas prioritet istiqamətlərdən olacaq”.
“Caspian Energy Holding” haqqında qısa məlumat:
İnvestisiya-konsaltinq holdinqi formatında fəaliyyət göstərən “Caspian Energy Holding” 2025-ci ildə “Caspian Energy” brendi altında birləşmiş bütün networking platformalar, media layihələr, forumlar və mükafatları vahid "Milli.Biz" ekosistemi daxilində konsolidasiya etmək məqsədilə təsis edilib. "Milli.Biz" ekosistemi əsasında “Caspian Energy Club”, Avropa ilə İqtisadi Əməkdaşlıq İctimai Birliyi və Azərbaycan Milli Biznes Assosiasiyası vasitəsi ilə 100-dən çox ölkədən olan sahibkarlara networking qurmaq imkanı yaradılacaq.
“Caspian Energy Holding”in tərkibinə aşağıdakı qruplar daxildir: “Caspian Energy Club”, “Caspian Energy Club International”, “Caspian Energy EXIFOR Group”, “Caspian Energy International Media Group”, “Award Organizers Group”, “Caspian Energy Research Group”, “Caspian Energy Entertainment Group”, “Caspian Energy Jobs Group”.
“Caspian Energy Club”a daxil olan sahibkarlar vahid "Milli.Biz" ekosistemi çərçivəsində hal-hazırda mövcud olan bütün xidmətlərlə yanaşı hüquq, maliyyə, turizm, konsaltinq və digər xidmətlərdən yararlana biləcəklər. "Milli.Biz" ekosisteminə inteqrasiya olunan qlobal loyallıq proqramı da tətbiq ediləcək.
2002-ci ildə dünyanın iri transmilli, dövlət və özəl neft-qaz və enerji şirkətləri tərəfindən yaradılan, mənzil-qərargahı Bakıda yerləşən “Caspian Energy Club” dünyanın 50 ölkəsindən 5000-dən çox şirkəti birləşdirən və dinamik inkişaf edən beynəlxalq biznes networking platformasıdır. “Caspian Energy Club” biznes-hökumət dialoqunun fəal iştirakçısıdır və əsas məqsədlərindən biri, Azərbaycanda və “Caspian Energy Club”ın fəaliyyət göstərdiyi digər ölkələrdə investisiya və işgüzar mühitin yaxşılaşdırılmasıdır.
“Caspian Energy Club International” 2023-cü ildə “Caspian Energy Club”ın beynəlxalq layihələrini və dünyanın 63 şəhərində fəaliyyət göstərən xarici ofisləri vahid standartlar əsasında idarə etmək məqsədilə yaradılıb. Bu strukturun nəzdində idarə olunan və yaxın 7 il ərzində dünyanın 100 ölkəsində nümayəndəlik açılması planlaşdırılan Azərbaycan Milli Biznes Assosiasiyası (MİLLİ.BİZ) – ölkə daxilində və ölkə hüdudlarından kənarda Azərbaycan sahibkarlarını birləşdirən, regionlarda istehsal olunan məhsul və xidmətləri beynəlxalq bazarlara çıxaran, həmçinin regionlara beynəlxalq investisiyaların cəlb edilməsində aktiv rol oynayan vahid işgüzar platformadır.
Bölmənin digər xəbərləri
