ABDOLBARİ GOZAL AHİK-İN MEDALI İLƏ TƏLTİF OLUNMUŞDUR
Aprelin 15-də medalın təqdim olunması münasibətilə Bakı Əyləncə Mərkəzində mərasim keçirilmişdir. Azərbaycan Kənd Təsərrüfatı və Qida Sənayesi İşçiləri Həmkarlar İttifaqı Federasiyasının sədri Tofiq Quliyev mərasimi açaraq “Azərsun” Holdinq Şirkətlər Qrupunun fəaliyyətindən danışmışdır. Ümummilli liderimiz Heydər Əliyev tərəfindən bünövrəsi qoyulan iqtisadi inkişafın Prezident İlham Əliyevin rəhbərliyi ilə uğurla davam etdirildiyini vurğulayan T. Quliyev demişdir ki, Abdolbari Gozala, bu mükafat, Azərbaycanda dünya standartlarına uyğun istehsalın qurulmasında, yeni iş yerlərinin açılmasında, işçilərə müasir tələblərə cavab verən əmək və iş şəraitinin yaradılmasındakı və ölkə iqtisadiyyatının yüksəldilməsi istiqamətindəki digər fəaliyyətinə görə verilmişdir.
Mərasimdə çıxış edən A.Gozal göstərilən diqqətə görə AHİK rəhbərliyinə təşəkkürünü ifadə etmişdir. Ölkəmizin iqtisadi yüksəlişində ulu öndər Heydər Əliyevin misilsiz xidmətlər göstərdiyini mərasim iştirakçılarının diqqətinə çatdıran A.Gozal Azərbaycanda sahibkarlığın daha da sürətlə inkişaf etdirilməsinə münbit şərait yaradıldığını bildirmişdir.
