ABŞ Əfqanıstandakı kontingentinin sayını 4 minədək azaltmaq niyyətindədir
Bakı, 4 avqust, AZƏRTAC
Birləşmiş Ştatlar yaxın zamanlarda Əfqanıstandakı kontingentinin sayını 4 min hərbçiyə qədər azaltmaq niyyətindədir.
AZƏRTAC xəbər verir ki, ABŞ Prezidenti Donald Tramp bu barədə Axios portalına müsahibəsində deyib.
“Qısa müddət ərzində Əfqanıstanda yerləşən qoşunlarımızın sayını 8 minə, sonra isə 4 minə qədər azaldacağıq. Hazırda bu istiqamətdə danışıqlar aparırıq”, - deyə ABŞ Prezidenti bildirib.
Donald Tramp jurnalistin bunun nə vaxt baş tutacağı barədə sualına - “Çox yaxında” - cavabını verib və dəqiq vaxt söyləməkdən yayınıb. Əlavə edib ki, ABŞ-da keçiriləcək prezident seçkiləri gününədək (3 noyabr) Əfqanıstanda təxminən 4-5 min hərbçi qalacaq.
Xatırladaq ki, fevralın 29-da ABŞ və “Taliban” hərəkatı arasında sülh sazişi imzalanıb. Sazişə əsasən, Birləşmiş Ştatlar və müttəfiqləri 14 ay ərzində öz qoşunlarını Əfqanıstandan çıxarmalıdır. “Taliban” hərəkatı isə öz növbəsində ölkə ərazisini Birləşmiş Ştatlar və müttəfiqlərinin təhlükəsizliyinə təhlükə törədəcək fəaliyyət üçün istifadə etməyəcəkləri barədə zəmanət verib. Sazişə əsasən, “Taliban” hərəkatı və Əfqanıstandakı digər tərəflər arasında danışıqlar və atəşkəs rejimi başlanmalıdır. Danışıqlardan öncə etimadın möhkəmlənməsi üzrə tədbirlər qismində hərəkatın həbsdə olan 5 min üzvü və Əfqanıstan ordusunun taliblərin əsirliyində saxlanılan minə yaxın əməkdaşı azad edilməlidir.
Bölmənin digər xəbərləri
