ABŞ-ın Ədliyyə Nazirliyi “American Airlines” və “US Airways” şirkətlərinin birləşməsinə icazə vermişdir
Bakı, 13 noyabr (AZƏRTAC). ABŞ Ədliyyə Nazirliyinin “American Airlines” və “US Airways” şirkətləri ilə razılaşması aviadaşıyıcıların birləşmə prosesini başa çatdıraraq dünyada ən böyük aviasiya şirkəti yaratmağa imkan verəcəkdir.
Razılaşmalara görə, yeni birləşmiş şirkət inhisarçıya çevrilməmək üçün büdcədən maliyyələşən aviaşirkətlərə ABŞ-ın ən iri aeroportlarında bir neçə slot verməli olacaqdır.
Slot təyyarələrin havaya qalxması və yerə enməsi üçün ayrılan vaxt intervalıdır. Böyük aeroportlarda slotlar çox baha ola bilər.
11 milyard dollarlıq sövdələşmə ABŞ-da Federal məhkəmə və Avropa İttifaqı tərəfindən bəyənilmişdir.
Lakin sonra federal hökumət iddia qaldırmışdır. İddiada deyilir ki, iki aviadaşıyıcının birləşməsi ABŞ-ın daxili bazarında “rəqabəti xeyli azaldacaq” və nəticədə biletlərin qiymətləri artacaq, istehlakçılara ziyan dəyəcəkdir.
Bölmənin digər xəbərləri
