Milli Qurtuluş Günü - Azərbaycan dövlətçiliyinin xilası və inkişaf yolunun başlanğıcı
Bakı, 13 iyun, AZƏRTAC
Azərbaycanın müasir tarixində elə taleyüklü günlər var ki, onların əhəmiyyəti yalnız bir dövrü deyil, bütöv bir dövlətçilik mərhələsini əhatə edir. 15 İyun – Milli Qurtuluş Günü məhz belə tarixlərdəndir. 15 İyun Azərbaycan xalqının müstəqilliyini, dövlətçiliyini və milli birliyini qorumaq əzminin təntənəsi olmaqla yanaşı, ölkəmizin sabitlik, inkişaf və tərəqqi yoluna qədəm qoymasının başlanğıcı kimi tarixə həkk olunub.
Bunu AZƏRTAC-a açıqlamasında Milli Məclisin deputatı Əlibala Məhərrəmzadə söyləyib.
O bildirib ki, 1990-cı illərin əvvəllərində müstəqilliyini yenidən bərpa edən Azərbaycan son dərəcə mürəkkəb və ağır sınaqlarla üzləşmişdi. Ölkədə siyasi böhran hökm sürür, idarəetmə sistemində ciddi çatışmazlıqlar müşahidə olunur, iqtisadi vəziyyət gündən-günə ağırlaşırdı. Ermənistanın hərbi təcavüzü nəticəsində torpaqlarımız işğala məruz qalır, daxildə isə anarxiya və özbaşınalıq dövlətçiliyin əsaslarını sarsıdırdı. Ayrı-ayrı silahlı dəstələrin fəaliyyət göstərməsi, separatçı meyillərin güclənməsi və hakimiyyət daxilində yaşanan qarşıdurmalar Azərbaycanı vətəndaş müharibəsi və parçalanma təhlükəsi ilə üz-üzə qoymuşdu.
Belə bir mürəkkəb şəraitdə xalqın yeganə ümidi böyük dövlətçilik təcrübəsinə malik olan Ulu Öndər Heydər Əliyev idi. Xalqın təkidli tələbi ilə 1993-cü il iyunun 9-da Bakıya qayıdan Ümummilli Lider Heydər Əliyev qısa müddət ərzində ölkədə yaranmış böhranın aradan qaldırılması istiqamətində qətiyyətli addımlar atdı. 1993-cü il iyunun 15-də Azərbaycan Respublikası Ali Sovetinin sədri seçilməsi isə ölkənin taleyində dönüş nöqtəsinə çevrildi. Sonralar bu tarixin Milli Qurtuluş Günü kimi qeyd olunması da məhz həmin günün dövlətçilik tariximizdəki müstəsna rolu ilə bağlıdır.
"Ulu Öndərin rəhbərliyi ilə, ilk növbədə, ölkədə ictimai-siyasi sabitliyin təmin olunması istiqamətində mühüm tədbirlər həyata keçirildi. Qanunsuz silahlı birləşmələrin fəaliyyətinə son qoyuldu, dövlət idarəçiliyində nizam-intizam yaradıldı, hüquqi dövlət quruculuğu prosesinə start verildi. Milli maraqlara söykənən xarici siyasət kursu müəyyənləşdirildi və Azərbaycanın beynəlxalq aləmdə etibarlı tərəfdaş kimi tanınmasının əsası qoyuldu. Məhz həmin dövrdə qəbul edilən strateji qərarlar ölkənin gələcək inkişaf istiqamətlərini müəyyənləşdirdi",- deyə Ə. Məhərrəmzadə vurğulayıb.
Deputatın sözlərinə görə, 15 İyunun tarixi əhəmiyyəti yalnız həmin dövrdə yaşanan böhranın aradan qaldırılması ilə məhdudlaşmır. Bu tarix Azərbaycanın gələcək inkişaf konsepsiyasının formalaşdığı, müstəqil dövlət quruculuğunun möhkəm təməllər üzərində bərqərar olduğu bir mərhələnin başlanğıcıdır. Ulu Öndər Heydər Əliyevin uzaqgörən siyasəti nəticəsində ölkədə sabitlik təmin olundu, iqtisadi dirçəlişə nail olmaq üçün əlverişli şərait yaradıldı, dövlət institutları möhkəmləndirildi və milli maraqların qorunması əsas prioritetə çevrildi.
Sonrakı illərdə həyata keçirilən enerji strategiyası, iqtisadi islahatlar, ordu quruculuğu və beynəlxalq əməkdaşlıq siyasəti Azərbaycanın regionun aparıcı dövlətlərindən birinə çevrilməsinə imkan yaratdı. Güclü iqtisadiyyatın formalaşdırılması, müasir Silahlı Qüvvələrin yaradılması və dövlət müstəqilliyinin möhkəmləndirilməsi istiqamətində atılan addımlar ölkəmizin gələcək uğurlarının əsasını təşkil etdi.
Bu siyasi kurs Prezident İlham Əliyevin rəhbərliyi ilə uğurla davam etdirilərək yeni mərhələyə yüksəldi. Dövlətimizin başçısının qətiyyətli siyasəti nəticəsində Azərbaycan ərazi bütövlüyünü və suverenliyini tam bərpa etdi, xalqımızın onilliklər boyu həsrətində olduğu tarixi ədalət təmin olundu. Bu gün işğaldan azad edilmiş torpaqlarda genişmiqyaslı quruculuq işlərinin aparılması, Böyük Qayıdış Proqramının uğurla həyata keçirilməsi və Qarabağın yenidən dirçəldilməsi Milli Qurtuluş ideyalarının real nəticəsi kimi qiymətləndirilə bilər.
"Milli Qurtuluş Günü Azərbaycan tarixində, sadəcə, bir təqvim günü deyil. Bu tarix dövlətçiliyimizin xilası, milli birliyimizin təntənəsi və müasir Azərbaycanın inkişaf yolunun başlanğıcıdır. 15 iyun xalqın öz liderinə olan inamının, dövlətçilik ənənələrinə sadiqliyinin və müstəqil gələcək uğrunda birliyinin rəmzidir. Bu günün yaratdığı siyasi və mənəvi əsaslar üzərində yüksələn Azərbaycan hazırda regionun ən güclü dövlətlərindən biri kimi öz inkişafını inamla davam etdirir və yeni uğurlara doğru irəliləyir",- deyə o əlavə edib.
Bölmənin digər xəbərləri
