ABŞ İQTİSADİYYATININ BƏRPA MÜDDƏTİ MÜƏYYƏN EDİLMİŞDİR
ABŞ iqtisadiyyatı 2008-ci ilin ikinci yarısında bərpa olunmağa başlanacaqdır. AZƏRTAC xəbər verir ki, ABŞ-ın maliyyə naziri Henri Polson bunu ABŞ şirkətlərinin top menecerləri qarşısında çıxışı zamanı bildirmişdir.
Onun sözlərinə görə, hazırda maliyyə bazarları iki həftə əvvəlkindən xeyli sabitdir. Buna baxmayaraq, daşınmaz əmlak bazarındakı problemlər iqtisadi inkişafın əsas əngəlidir. Bu problem ABŞ vətəndaşları üçün nəzərdə tutulmuş vergi stimulları paketinin qüvvəyə minməsi sayəsində aradan qaldırılacaqdır.
Maliyyə nazirinin bu bəyanatı ABŞ iqtisadiyyatının bərpası ilə bağlı son vaxtlar söylənilən nikbin fikirlərdən biridir. Ağ evdə hesab edirlər ki, bu məsələdə antiböhran tədbirləri, o cümlədən gəlir vergisinin bir hissəsinin vətəndaşlara qaytarılması müsbət rol oynamışdır.
Fərdi vergi ödəyicilərinə və ailələrə təxminən 300-1200 dollar məbləğində gəlir vergisi qaytarılacaqdır. Bu, ABŞ Prezidentinin iqtisadiyyatın bərpasına 168 milyard dollar ayrılması barədə imzaladığı plana daxildir.
Bölmənin digər xəbərləri
