Tallinn, 5 avqust, AZƏRTAC

ABŞ Baltik dənizində NATO-nun hava polisi missiyası çərçivəsində aviadəstələrin yerləşdiyi Şyaulyay şəhərindəki Litva Hərbi Hava Qüvvələrinin aviabazasının modernləşdirilməsinə 24 milyon avro məbləğində maliyyə vəsaiti ayırıb.

AZƏRTAC Litva Müdafiə Nazirliyinin açıqlamasına istinadla xəbər verir ki, bu vəsaitə infrastruktur obyektlər - nəqliyyat vasitələrinin və yerüstü avadanlıqların təmiri üçün yeni anqarlar, əməliyyat mərkəzləri, üç perron, qırıcı təyyarələr üçün müasir “tələlər”, perronlardan birinin işıqlandırılması, təyyarələr üçün bir neçə zolaq və sahələr, həmçinin yerüstü nəqliyyatını hərəkəti üçün yollar daxildir.

“2016-2020-ci illərdə yeni infrastruktur obyektlərinin təchiz edilməsi məqsədilə Avropa Təhlükəsizlik Təşəbbüsü Fondundan 24 milyon avro vəsait ayrılıb. Hazırda 16 obyektin təmiri tamamilə yekunlaşıb, daha iki obyektin inşasının bu il başa çatması nəzərdə tutulur”, - deyə nazirliyin məlumatında deyilir.

Asiman Əsədov

AZƏRTAC-ın xüsusi müxbiri

Tallinn