ABŞ VƏ RUSİYA TERRORİZMLƏ MÜBARİZƏ MƏSƏLƏLƏRİNİ MÜZAKİRƏ EDİRLƏR
Terrorizmlə mübarizə üzrə ABŞ-Rusiya işçi qrupunun 10-cu iclası başa çatmışdır. AZƏRTAC-ın müxbiri Vaşinqtondan xəbər verir ki, ikigünlük müzakirələr zamanı nümayəndə heyətləri terrorun maliyyələşdirilməsinin, bölgədə narkotik maddələrin dövriyyəsinin, terrorizm məqsədi ilə bioloji, nüvə və radioloji materiallardan istifadənin qarşısının alınması məsələlərini nəzərdən keçirmişlər. ABŞ və Rusiya mütəxəssisləri Qafqaz, Mərkəzi Asiya, Əfqanıstan və Balkan yarımadasındakı vəziyyətə də toxunmuşlar. Tərəflər Qafqaz və Mərkəzi Asiya bölgəsində beynəlxalq ictimaiyyətə inteqrasiya və iqtisadi əməkdaşlıq vasitəsi ilə inkişafın sürətləndirilməsinə dair konkret təkliflər ətrafında işləmək haqqında razılığa gəliblər.
İşçi qrupuna ABŞ tərəfindən dövlət katibinin birinci müavini Riçard Armitac, Rusiya tərəfindən isə xarici işlər nazirinin birinci müavini Vyaçeslav Trubnikov başçılıq edir. Növbəti iclas 2004-cü ilin yanvarında Rusiyada keçiriləcəkdir.
Bölmənin digər xəbərləri
