Abşeron rayonu Məmmədli kəndində “Makarov” satmaq istəyən şəxs saxlanılıb
Bakı, 16 fevral, AZƏRTAC
Abşeron Rayon Polis İdarəsinin Mehdiabad Polis Bölməsinin əməkdaşları tərəfindən həyata keçirilən tədbir zamanı Məmmədli kənd sakini əvvəllər məhkum olunmuş 1974-cü il təvəllüdlü Həbib Bayramov üzərində qanunsuz olaraq odlu silah gəzdirdiyi üçün saxlanılıb.
Daxili İşlər Nazirliyinin mətbuat xidmətindən AZƏRTAC-a verilən məlumata görə, saxlanılan şəxsdən “Makarov” markalı tapança, 5 ədəd patron və 1 ədəd patron darağı aşkar olunaraq götürülüb.
H.Bayramov silahı bir müddət əvvəl əldə etdiyini, amma polisə könüllü təhvil vermək əvəzinə satmaq niyyəti ilə özündə saxladığını bildirib. Faktla bağlı Mehdiabad Polis Bölməsində araşdırmalar davam etdirilir.
Qanunsuz saxlanılan odlu silah-sursatın əməliyyat yolu ilə aşkar olunması istiqamətində tədbirlər davam etdirilir.
Bölmənin digər xəbərləri
