- Hörmətli xanımlar və cənablar!

Əziz dostlar!

İlk növbədə, məni dəvət etdiyinə və ikitərəfli iqtisadi münasibətlər ətrafında fikir mübadiləsini aparmaq üçün yaradılmış fürsətə görə Abu-Dabi Ticarət Palatasına öz minnətdarlığımı bildirmək istəyirəm. Mən gözəl ölkənizə səfər etməkdən olduqca məmnunam. Bu, ölkələrimiz arasında diplomatik münasibətlərin qurulmasından bəri Azərbaycan Respublikası Prezidentinin Birləşmiş Ərəb Əmirliklərinə ilk rəsmi səfəridir.

Azərbaycan müstəqilliyinin cəmi on beşinci ilini yaşayır. Ölkəmiz müstəqilliyinin ilk illərində üzləşdiyi çətinliklərin tam aradan qaldırılmasına bütün səylərini sərf etmiş və sürətli siyasi və iqtisadi inkişafına başlamışdır. Sovet İttifaqı dağıldıqdan sonra müstəqilliyini qazanmış Azərbaycanda daxili vəziyyət çox ağır idi. Ölkədə iqtisadi böhran, istehsalatda tənəzzül müşahidə olunurdu. Siyasi problemlər özünü büruzə verirdi. Vətəndaş müharibəsi və digər xoşagəlməz hadisələr baş verirdi. Bütün bunlar Azərbaycana inkişaf etməyə və regionun güclü ölkəsinə çevrilməyə imkan vermirdi.

Lakin Prezident Heydər Əliyev tərəfindən 1993-cü ildə başlanmış siyasi və iqtisadi islahatlar siyasətinin davamlı şəkildə aparılması Azərbaycanı regionumuzda və bütövlükdə bütün keçmiş sovet respublikaları arasında iqtisadi inkişaf baxımından ən qabaqcıl ölkəyə çevirdi. Azərbaycanda aparılan olduqca cəsarətli siyasi, iqtisadi və sosial islahatlar tarixi baxımdan çox qısa dövr ərzində bizə bütün çətinlikləri və böhranı aradan qaldırmağa və çoxşaxəli qaydada inkişaf etməyə imkan yaratdı. Həmin vaxtdan etibarən Azərbaycan çox böyük müvəffəqiyyətlər əldə etdi.

Bu gün ölkənin iqtisadi inkişafı sosial ehtiyaclar üçün daha çox vəsait sərf olunmasına imkan yaradır. Ötən il bizim iqtisadi artımımız 26 faiz olmuşdur, bu il isə artıq 34 faiz təşkil edir. Bu rəqəm dünyada ən yüksək göstərici sayılır. Təbii ki, iqtisadi inkişaf göstəriciləri reallıqda olan vəziyyətdən fərqlənir. Lakin mütləq göstəricilər artmaqdadır. İnkişafımızın dinamik olmasını, bütün iqtisadi fəaliyyət sahələrini əhatə edən proqramlarımızı nəzərə alaraq, əminəm ki, gələcək illərdə çox möhkəm iqtisadiyyatın qurulmasına nail olacaq və Azərbaycan xalqının tələbatlarını ödəyəcəyik.

Təbii ki, iqtisadiyyatımızın əsas sektorlarından biri enerji, yəni neft və qaz sektorudur. Həmin sektora son on il ərzində milyardlarla dollar sərmayə yatırılıbdır. Azərbaycanın neft yataqlarından hasil olunan neft bu gün müasir boru kəmərləri sistemi vasitəsilə dünya bazarlarına çıxarılır. Neft hasilatının həcmi artır və əldə olunan neft gəlirləri iqtisadiyyatımızı şaxələndirməyə imkan yaradır. Bu gün hökumətimiz qarşısında duran əsas vəzifələrdən biri neft kapitalını insan kapitalına çevirməkdən ibarətdir. Eyni zamanda, iqtisadiyyatın yeni sektorlarının yaradılmasına, xüsusən də sənaye inkişafının təmin olunmasına böyük önəm verilir. Bütün bunlar gələcəkdə neft qiymətlərindən asılı olmamaq və şaxələndirilmiş iqtisadiyyata malik olmaq üçün edilir.

Neft çoxlu pul gətirir, lakin çoxlu sayda yeni iş yerləri açmır. Hazırda qarşımızda duran məqsəd işsizliyin tam aradan qaldırılmasıdır və bu istiqamətdə olduqca böyük addımlar atılmışdır. Son üç il ərzində, biz Azərbaycanda təqribən 500 min yeni iş yerinin açılmasına nail olmuşuq. Həmin iş yerlərinin əksəriyyəti Azərbaycanın rayonlarında yaradılmışdır. Bu, regional inkişaf proqramının uğurla həyata keçirilməsindən xəbər verir.

Bizim çox müasir nəqliyyat infrastrukturumuz var. Coğrafi mövqeyimiz çox əlverişlidir. Ölkəmiz Avropa ilə Asiyanın kəsişdiyi nöqtədə yerləşir və biz infrastrukturumuz, təcrübəmiz, insanlarımızın istedadı və potensialımız əsasında coğrafi mövqeyimizdən istifadə edirik. Biz artıq regional məsələlərdə mühüm rol oynayırıq. İqtisadi cəhətdən güclü ölkədə, təbii ki, müstəqillik də möhkəmlənir. Ölkəmizin uzun onilliklər və əsrlər boyu öz müstəqilliyindən məhrum olduğunu nəzərə alsaq, bu amil olduqca vacibdir.

İqtisadi imkanlarımız və potensialımız insanların həyat tərzini yaxşılaşdırmaqla yanaşı, müstəqilliyimizin möhkəmləndirilməsi üçün də vacib vasitədir. Ona görə siyasi inkişaf, regional əməkdaşlıq, iqtisadi islahatlar, sosial problemlərin həllinə verilən böyük diqqət bizim üçün əsas prioritet məsələlərdir.

Son üç ilyarım ərzində dövlət büdcəmiz üç dəfədən çox artmışdır. Hazırda, biz neft və qaz sektorunun böyük inkişafı ərəfəsindəyik. Gələn illər ərzində neft hasilatının həcmi gündə ən azı bir milyon barrelə çatacaqdır. Neftdən əldə olunan gəlirlərin infrastrukturun inkişafı, sosial proqramların həyata keçirilməsi kimi vacib məsələlərin həllinə yönəldilməsi məqsədi ilə biz Neft Fondu yaratmışıq. Eyni zamanda, gələcək nəsillər üçün ehtiyat fondlarının formalaşdırılması iqtisadi siyasətimizin əsas meyarlarındandır.

Planlarımız çoxdur. Bunların böyük hissəsi artıq uğurla həyata keçirilmişdir. Təbii ki, regional əməkdaşlıq, tərəfdaşlarımızla dost və qardaş ölkələrlə əməkdaşlığımız bizim üçün böyük əhəmiyyət kəsb edir. Bu baxımdan Birləşmiş Ərəb Əmirlikləri ilə Azərbaycan arasındakı münasibətlər dost və qardaş ölkələr arasındakı əlaqələrə nümunə hesab edilə bilər. Neçə illər ərzində əlaqələrimiz çox yüksək səviyyədə olmuşdur. Əminəm ki, ölkənizə etdiyim səfər həmin münasibətlərə daha da böyük təkan verəcəkdir və ölkələrimizin işgüzar dairələri yeni əməkdaşlıq sahələrini müəyyən edəcəklər.

Əməkdaşlığın digər sahəsi birgə layihələrdə iştirakdan ibarət ola bilər. Mən artıq qeyd etdim ki, biz Dövlət İnvestisiya Şirkəti yaratmışıq və həmin qurum məhz potensial sərmayədarların axtarılması ilə məşğul olacaqdır. O, hətta texniki əsaslandırma sənədlərini də tərtib edə və potensial sərmayədarları dəvət edə bilər. Beynəlxalq kreditlər tələb edən layihələrdə ölkəmiz etibarlı tərəfdaş nüfuzunu artıq qazanmışdır. Bakı-Tbilisi-Ceyhan boru kəmərinin çəkilməsi üçün beynəlxalq maliyyə təsisatları, banklar konsorsiumu milyardlarla dollar kredit ayırmışlar. Eyni üsul digər layihələrdə də istifadə edilmişdir. Ona görə beynəlxalq bazarlarda maliyyə vəsaitləri toplamaq baxımından problem olmayacaqdır.

Bütün bunlar yaxşı imkanları təmin edir. Ona görə də biz ölkənizin işgüzar dairələrini Azərbaycana dəvət edir və bizimlə işbirliyi qurmağa çağırırıq. Bu gün çatışmazlıq yalnız ondadır ki, Azərbaycan haqqında məlumat hələ də kifayət dərəcədə yayılmır. Bu, xüsusən də, biznes imkanlarına aiddir. Ona görə, biz sizinlə işləyirik. Rəsmilərimiz burada, sizinlədir. İş adamları burada əyləşiblər. Biz özümüzü və imkanlarımızı təqdim etmək üçün çox çalışmalıyıq. Yəni nəyimiz var və nə edə bilərik. Əminəm ki, bu gün keçirdiyimiz görüş bu baxımdan vacibdir və əhəmiyyətli olacaqdır. Biznes adətən təhlükəsiz, dostluq olan və proqnozlaşdırılan yerlərə, gəlir gətirən ölkələrə getməyə üstünlük verir. Bütün həmin meyarlar Azərbaycanda var. Ölkəmizdə ictimai-siyasi sabitlik mövcuddur. Biz bir-birimizlə dostuq və Azərbaycanda qarşılıqlı fayda verəcək bir çox işlər var. Əminəm ki, bu, baş verəcək və mənim səfərimdən sonra daha çox əməkdaşlığın şahidi olacağıq.

Hörmətli dostlar, mən bu fürsətdən istifadə edərək, sizi Azərbaycana dəvət edirəm və oradakı vəziyyəti özünüz görə biləcəksiniz. Təqdimatda nə qədər yaxşı olursa-olsun, lakin belə kəlam var: bir dəfə görmək, yüz dəfə eşitməkdən yaxşıdır. Bu dəvətlə mən çıxışımı başa vururam və gözəl ölkənizdə olduğumuz ilk dəqiqələrdən hiss etdiyimiz xoş qonaqpərvərliyə görə sizə öz minnətdarlığımı bildirirəm. Birləşmiş Ərəb Əmirlikləri xalqına rifah, sülh və uğurlar arzulayıram.

Çox sağ olun.