Ağ ev defoltdan qurtulmaq imkanının olmadığını etiraf edir
Bakı, 27 iyul (AZƏRTAC). Ağ ev respublikaçıların dövlət borcu ilə bağlı təklif etdikləri qanun layihəsinə Prezident vetosu qoymağa hazır olduğunu bəyan etmişdir.
Bəyanatda deyilir ki, Barak Obama administrasiyası ABŞ Konqresi Nümayəndələr Palatasının sədri Con Beynerin bir gün əvvəl təqdim etdiyi qanun layihəsinə qəti etiraz edir. Bəyanatda daha sonra deyilir: “Əgər bu sənəd Prezidentə göndərilsə, köməkçiləri ona veto qoymağı məsləhət görəcəklər”.
Beləliklə, ABŞ-ın borc öhdəlikləri üzrə defoltun müddəti yaxınlaşdıqca, vəziyyət daha da gərginləşir.
Dövlət xərclərini azaltmaqla yanaşı, dövlət borcunun son həddinin artırılmasının ikimərhələli planını irəli sürən Beyner əvvəlcə son həddi 1 trilyon dollar artırmağı, dövlət xərclərini isə 1,2 trilyon dollar azaltmağı təklif edir. Lakin Ağ ev həmin təklifə problemi həll etməyən qısamüddətli tədbir kimi baxır və dövlət borcunun həddinin ən azı 2012-ci ilin sonunadək artırılmasını nəzərdə tutmayan istənilən qanun layihəsinə veto qoyacağı ilə hədələyir.
Barak Obama Administrasiyası etiraf edir ki, ABŞ hökumətinin borc öhdəlikləri üzrə defoltun qarşısını almaq üçün daha manevr etmək imkanı yoxdur. Yeganə çıxış yolu dövlət borcunun həddini artırmaqdır. Bu fikri jurnalistlər üçün brifinqdə Ağ evin mətbuat katibi Cey Karni səsləndirmişdir.
Bölmənin digər xəbərləri
