Akademik Milli Dram Teatrı Yeni il şənliklərinə hazırlaşır
Bakı, 18 dekabr, AZƏRTAC
Azərbaycan Dövlət Akademik Milli Dram Teatrında Yeni il şənlikləri təşkil olunacaq.
Teatrın mətbuat xidmətindən AZƏRTAC-a bildirilib ki, şənlik münasibətilə hazırlanan “Rəqs edən pinqvinlər” adlı səhnə əsərinin müəllifi və rejissoru Anar Sadıqov, rejissor assistentləri Xanım Həsənova və Könül Kərimovadır. Maraqlı dekorasiyası, nağılvarı tərtibatı və maraqlı obrazları ilə uşaqları sevindirəcək tamaşanın rəssam işi Əməkdar Mədəniyyət İşçisi İlham Elxanoğluna, rəqslərin quruluşu isə Lalə Hacıyevaya məxsusdur.
Tamaşada əsas rolları Əməkdar Artist Elxan Quliyev və aktyor Mətləb Abdullayev (Şaxta baba), aktrisa İlahə Həsənova (Qar qız) canlandıracaq. Digər rollarda Əməkdar artistlər Əlvida Cəfərov, Şəlalə Şahvələdqızı, Mehriban Xanlarova, Mirzə Ağabəyli, aktyorlar Rada Nəsibova, Elnur Qədirov, Firuzə Balayeva və Rüstəm Rüstəmov çıxış edəcək.
Yeni il şənlikləri dekabrın 23, 24, 28, 29, 30, 31-dən yanvarın 7-nə kimi hər gün dörd seansda təqdim olunacaq.
Biletləri şəhərin bütün kassalarından əldə etmək olar.
Bölmənin digər xəbərləri
