ALİYƏ QARAYEVA DÜNYA KUBOKU YARIŞLARININ FİNAL MƏRHƏLƏSİNDƏ BÜRÜNC MEDAL QAZANMIŞDIR
Azərbaycan gimnastı Aliyə Qarayeva İspaniyanın Benidorm şəhərində keçirilən Dünya Kuboku yarışlarının 7-ci final mərhələsində bürünc medala layiq görülmüşdür.
Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, Pekin Olimpiya oyunlarının iştirakçısı üçüncü yeri iplə hərəkətlərdə tutmuşdur. O, halqa, gürz və lentlə hərəkətlərdə 6-cı nəticə göstərmişdir.
“Neftçi” İdman-Sağlamlıq Mərkəzinin yetirməsi oktyabrın 10-12-də klublararası dünya çempionatında iştirak etmək üçün İspaniyadan Yaponiyaya yola düşəcəkdir. Yarışlarda Aliyə ilə birlikdə ölkəmizi Zeynəb Cavadlı və Samirə Mustafayeva təmsil edəcəklər.
Bu arada Qlazqoda yeniyetmələr arasında akrobatik gimnastika üzrə dünya yarışları başa çatmışdır. Yarışlarda Azərbaycanı Elçin Məmmədov-Emil Yarəhmədov dueti təmsil etmişdir. Akrobatlarımız balans hərəkətlərindən sonra 15 cütlük arasında 9-cu olmuş, sürətli kombinasiyanı isə daha yaxşı yerinə yetirmiş, beləliklə, iki növün nəticələrinə görə 6-cı yeri tutaraq finala vəsiqə qazanmışdır.
Cütlük kombinasiyalı hərəkətlə final çıxışının nəticələrinə görə Ermənistan və Portuqaliya təmsilçilərini geridə qoyaraq, bu dəfə də 6-cı nəticə göstərmişdir.
Qlazqo bu həftə də dünya akrobatikasının diqqət mərkəzində olacaqdır. Oktyabrın 10-da burada dünya çempionatı başlayacaqdır. Turnirdə Azərbaycanı Ayla Əhmədova-Dilarə Sultanovadan ibarət qadın cütlüyü, Rüstəm Nəcəfquliyev, İlham Abbasov, Elnur Məmmədov və Fərid Məmmədovdan ibarət kişi qrupu təmsil edəcəkdir.
Bölmənin digər xəbərləri
