ALLA AXUNDOVANIN MOSKVADA YARADICILIQ GECƏSİ KEÇİRİLMİŞDİR
Gecədə Rusiyanın və Azərbaycanın tanınmış ədibləri, tənqidçiləri, habelə A.Axundovanın dostları və pərəstişkarları toplaşmışdılar. Onlar fərdi üsluba malik şairin istedadından söhbət açmışlar.
Gecənin aparıcısı, şair və tərcüməçi Kirill Kovalci Alla Axundovanın Rusiya və Azərbaycan ədəbiyyatının inkişafına töhfəsini yüksək qiymətləndirmiş və onun çoxşaxəli yaradıcılığından danışmışdır.
Ədəbiyyatşünas Stanislav Lesnevski, nasir Yevgeni Boqdanov, rejissor Keti Dolidze, yazıçı Çingiz Abdullayev və başqaları A.Axundovanın şeirlərinin fəlsəfi dərinliyindən, incə çalarlarından söhbət açmışlar.
Azərbaycanın Rusiyadakı səfirliyinin müşaviri Nigar Axundova demişdir ki, Alla xanımın yaradıcılığının kökləri iki mədəniyyətdən – Azərbaycan və rus mədəniyyətlərindən bəhrələnir və onlar bir-birini tamamlayır, mədəniyyətlərin qarşılıqlı təsirinin parlaq nümunəsi kimi şairin poeziyasına xüsusi dərinlik və kolorit gətirirlər.
Təkcə Rusiyada və Azərbaycanda deyil, dünyanın bir çox ölkələrində də nəşr edilmiş onlarca poetik kitabın müəllifi həm də çoxlu kino və teatr ssenarisi yazmışdır. Onun şeirləri iki antologiyada – XX əsr rus poeziyası və uşaqlar üçün poeziya toplularında dərc edilmişdir. A.Axundovanın yaradıcılığında “Dədə Qorqud” dastanının, bir çox Azərbaycan yazıçılarının əsərlərinin tərcümələri xüsusi yer tutur.
Sonda Alla Axundova öz şeirlərini oxumuşdur.
Bölmənin digər xəbərləri
