Almaniyada oynayan azərbaycanlı futbolçu: Əsas hədəfim Bundesliqada çıxış etməkdir - MÜSAHİBƏ
Bakı, 11 noyabr, AZƏRTAC
Azərbaycanın U-15 yığmasının və Almaniyanın “Herta Zelendorf” klubunun futbolçusu Zeyd Nəsirulla AZƏRTAC-ın suallarını cavablandırıb. Həmin müsahibəni təqdim edirik.
- Əvvəlcə özünüz barədə məlumat verməyinizi istərdik…
- Mənim 14 yaşım var. Bakıda 276 nömrəli məktəbdə oxumuşam. Altı yaşımda “Vətən” futbol məktəbinə getmişəm. Səkkiz yaşım olarkən “Sabah” komandasına keçmişəm. 2017-ci ildən 2023-cü ilə qədər bu klubun formasını geyinmişəm. “Sabah”da oynadığım müddətdə milli komandaya dəvət almışam və kapitan olmuşam. Hazırda isə Almaniyanın Regionalliqasında çıxış edən “Herta Zelendorf” komandasında oynayıram.
- Futbola marağınız necə yaranıb?
- Atam da futbol fanatıdır. Buna görə də məni uşaq yaşlarımdan topla tanış edib. Mənimlə xüsusi məşğul olurdu. Düşünürəm ki, əziyyətimiz boşa getmədi.
- Bəs, Almaniya klubuna keçidiniz necə baş tutdu?
- Alman futboluna hər zaman xüsusi marağım olub. Amma bu cür ölkələrə köçmək və yaşamaq elə də asan proses deyil. Buna görə də atamla iki dəfə Almaniyaya turist kimi səyahət etdik. Nürnberq və Berlin şəhərlərində olduq. Hər iki səfərdə məqsədimiz alman futbolu ilə daha yaxından tanış olmaq, sistemin necə işlədiyini öyrənmək idi. Baxışda olduğum bütün komandalarda özümü yaxşı tərəfdən göstərə bildim. Klublar məni heyətinə qatmaq istəsə də, qarşımda iki böyük problem dururdu: birincisi, Almaniya ərazisində müvəqqəti və ya daimi yaşadığını təsdiq edən sənəd (oturum), ikincisi isə klubların tələbləri. Bütün klub məşqçiləri mənim çıxışımı bəyənsə də, əvvəlcə daha aşağı liqalarda oynamağımı istəyirdilər. Mənə deyirdilər ki, aşağı liqalarda oynamağa başla, skautlarımız səni götürəcəklər. Amma burada ortaya böyük sual çıxırdı: Biz həmin komandaları necə tapacağıq, tapsaq belə, yoxlanış hansı formada olacaq? Şansa inanmasam da, bir az bəxtim gətirdi. “Herta Zelendorf” komandasındakı məşqçim öz dostunun nömrəsini verdi və hər şeyi bizə başa saldı. Bizə saat neçədə harada olacağımızı bildirdi. Biz də onun dediklərini olduğu kimi etdik. “Raynikendorf Fyüxze” komandasında yoxlama məşqinə çıxdım və artıq 3-5 dəqiqə sonra köməkçi məşqçi atam və qardaşıma yaxınlaşaraq, mənimlə sözləşmə imzalamaq istədiklərini söylədi. Amma yenə də ən böyük problemimiz aradan qalxmamışdı və mən iki gün sonra Azərbaycana qayıtmalı idim. Çünki vizamın vaxtı bitirdi. Təəssüf ki, hər şeyi olduğu kimi qoyub Bakıya gəlməli olduq. Bu mərhələdə nə etməli olduğumuzu fikirləşirdik. Ailəm qərara gəldi ki, sırf mənə görə Almaniyaya köçək. Buna görə valideynlərimə minnətdaram. Əslində riskli qərar idi. Çünki mənim hansı komandada necə oynayacağım müəmmalı idi. Böyük komandalar heç bir oyunçunu ilk baxışdan heyətinə qatmır. Buna baxmayaraq, atam iş vizası aldı və biz Almaniyada yeni həyata başladıq. Təbii ki, ailəm üçün çox çətin oldu. Vətəni tərk edib başqa ölkədə yaşamaq elə də asan deyil. Almaniyaya gəldikdən sonra yenə həmin komandanı tapıb orada cəmi 1 ay oynadım. Daha sonra isə yuxarı liqada çıxış edən “Herta Zelendorf” komandası yeni mövsümün başlamasına təxminən bir ay qalmış mənə təklif göndərdi. Mən isə dəvəti qəbul etdim.
- Maraqlıdır, yeni komandanızda sizi necə qarşıladılar?
- Açığı, azərbaycanlı olduğumu biləndən məni isti qarşıladılar. İndiyə qədər Almaniyadakı liqalarda çox az sayda həmyerlimiz çıxış etdiyi üçün komanda yoldaşlarımın ilk azərbaycanlı tanışları mənəm. Buna görə mən də öz ölkəmi çox gözəl təmsil etməyə çalışıram.
- “Herta Zelendorf” komandasında əsas heyət üzvüsünüz? Ümumiyyətlə, məşqçilərin sizdən gözləntiləri nədir?
- Bəli, demək olar ki, bütün matçlarda tam hissə oynayıram. Azərbaycandakı məşqçilərim kimi, buradakıların da məndən gözləntiləri dünyanın ən yaxşı komandalarında oynamağımdır. Hətta mənə deyirlər ki, Almaniya milli komandasında da oynaya bilərsən. Amma mən azərbaycanlıyam və ən böyük hədəflərimdən biri doğma ölkəmin yığmasında çıxış etməkdir.
- Gələcəkdə Almaniya Bundesliqasında oynamaq şansınızı necə dəyərləndirirsiniz?
- Artıq alman futbolu ilə tanışam və Bundesliqa mənə çox yaxındır. Almaniyanın yüksək Liqasında oynamaq əsas və ən yaxın hədəflərimdən biridir.
- Almaniyanın başqa klublarından sizə təkliflər var?
- Bəli, var. Amma hələlik mövsümün əvvəlidir. Ortada rəsmi anlaşma olmadığı üçün klub adı çəkmək istəmirəm.
- Azərbaycanda legioner həyatı yaşamaq istəyən, amma müəyyən səbəblərdən bunu reallaşdıra bilməyən həmyaşıdlarınıza nə məsləhət görərdiniz?
- Ən böyük məsləhətim odur ki, məşqçilərin tapşırıqlarını düzgün yerinə yetirsinlər. Məşqləri öz həyatlarında birinci sıraya qoysunlar. Ən əsası isə intizamlı olsunlar. Çünki futbolun açarı nizam-intizamdır.
Bölmənin digər xəbərləri
