ALMANİYADA “QARDAŞLAŞMIŞ ŞƏHƏRLƏRİN TANINMIŞ QADINLARI” ADLI BEYNƏLXALQ SƏRGİ KEÇİRİLMİŞDİR
AZƏRTAC-ın xüsusi müxbiri xəbər verir ki, martın 8-25-də Mayntsda “Qardaşlaşmış tərəfdaş şəhərlərin tanınmış qadınları” adlı beynəlxalq sərgi keçirilmişdir. Sərgidə Mayntsın tərəfdaş şəhərləri Bakı (Azərbaycan), Zaqreb (Xorvatiya), Valensiya (İspaniya), Dijon (Fransa), Erfurt (Almaniya), Hayfa (İsrail), Luisvill (ABŞ) və Watford (İngiltərə) şəhərlərindən olan üç tanınmış qadın xadimin həyat və yaradıcılığı barədə məlumat verilmiş, portretləri təqdim olunmuşdur. Ümumilikdə səkkiz tərəfdaş şəhərin 24 tanınmış qadınının portretlərinin təqdim edildiyi sərgi Mayntsda böyük əks-səda doğurmuşdur.
Bakı şəhəri Azərbaycanın ilk opera müğənnisi Şövkət Məmmədova, Azərbaycanın ilk təyyarəçi qadını Leyla Məmmədbəyova və tanınmış alim- yazıçı Əzizə Cəfərzadənin portretləri ilə təmsil olunmuşdur.
Bu günlərdə sərgi haqqında kitabça çap edilmişdir. Nəfis tərtibatlı kitabçaya Maynts şəhər bələdiyyəsinin başçısı Yens Boytel ön söz yazmışdır. Kitabçada, həmçinin Bakı və sərgidə portretləri təqdim edilən üç Azərbaycan xanımı haqqında ətraflı məlumat verilmişdir.
Kitabçada 1984-cü ildən Mayntsla qardaşlaşmış Bakıda hələ 1865-ci ildə Qızlar üçün məktəbin təməlinin qoyulması və 1921-ci ildən qadınların seçib-seçilmək hüququna malik olduqları barədə də informasiya vardır.
Bölmənin digər xəbərləri
