AMAZONKA CƏNGƏLLİKLƏRİNDƏ İNDİYƏ QƏDƏR MƏLUM OLMAYAN QƏBİLƏ AŞKAR EDİLMİŞDİR
AZƏRTAC xarici informasiya agentliklərinə istinadla xəbər verir ki, bu yaxınlarda məşhur Amazonka meşələrində tədqiqat aparan elmi ekspedisiya orada heç vaxt sivilizasiya ilə əlaqəsi olmamış qəbilə aşkar etmişdir. Qəbilənin məskəni Braziliya ilə Peru sərhədində yerləşir.
Tədqiqatçılar hindilərdə immuniteti olmayan xəstəliklərin mənbəyinə çevrilməmək üçün onların məskənlərinə getməkdən vaz keçirlər. Qəbilə üzvlərini epidemiyalardan əlavə daha bir təhlükə gözləyir - meşələrin qırılması. İş burasındadır ki, “planetimizin ağ ciyərləri” sayılan Amazonka meşələri ağlasığmaz dərəcədə sürətlə məhv edilir. Ekspertlər Braziliyanın Akra ştatındakı meşələrin üzərində təyyarə ilə bir neçə dəfə dövrə vurmuş və qəbilə sakinlərini, eləcə də onların keçilməz meşələrin arasındakı komalarının fotoşəklini çəkməyə müvəffəq olmuşlar.
Fotoşəkillərdən görünür ki, hindilərin bədəni al-qırmızı rənglənmişdir, başları üzərindən uçan təyyarəyə kamandan ox atırlar. Braziliya hökumətinin nümayəndələrinin sözlərinə görə, əldə edilmiş fotoşəkillər sübut edir ki, naməlum qəbilələr hələ də vardır və bu fotoşəkillər icmanın yerləşdiyi torpaqları qorumağa kömək edəcəkdir.
Ekspedisiyanın işində Braziliya hindilərinin işləri üzrə Departamentin nümayəndəsi də iştirak etmişdir. Onun fikrincə, bu cür məskənlərin sayı artmaqdadır. Sivilizasiya ilə əlaqə yaratmaq istəməyən qəbilələr sərhədin Peru tərəfində meşələrin qeyri-leqal qırılması ucbatından Braziliyaya üz tutmağa məcburdurlar. Bu isə toqquşmalara gətirib çıxara bilər, çünki sərhədyanı rayonlar ümumi sayı 500 nəfərə çatan qəbilələr tərəfindən artıq tutulmuşdur.
Bölmənin digər xəbərləri
