Samirə Səfi: HÜDUD sərgisi sabitliklə parçalanması arasındakı sərhədləri araşdırır
Bakı, 10 iyun, AZƏRTAC
Tural Möyüfovun əsərlərində məni ilk növbədə onun insan fiquruna xüsusi yanaşması cəlb edib. Onun rəngkarlığında insan fiquru sadəcə bədənin təsviri və ya müəyyən süjetə daxil edilmiş personaj kimi çıxış etmir. Əksinə, fiqur daxili gərginliyin, hərəkətin və davamlı transformasiyanın məkanına çevrilir.
Bu barədə AZƏRTAC-ın müxbiri ilə söhbətində “HÜDUD” sərgisinin kuratoru Samirə Səfi danışıb.
“Turalın rəngkarlığında məni maraqlandıran onun tanınanla abstraktın qovşağında mövcud olmasıdır. Bir tərəfdən biz hələ də insan bədənini görür və onun varlığını hiss edirik. Digər tərəfdən isə forma parçalanmağa, yerini dəyişməyə və anatomik dəqiqliyin sərhədlərindən kənara çıxmağa başlayır. Məhz bu qeyri-sabitlik, əsərlərinin plastik enerjisi və daxili dinamikası sərgi layihəsini formalaşdırarkən mənim üçün başlanğıc nöqtəsi oldu”, – deyə kurator bildirib.
Sərginin konsepsiyasından danışan Samirə Səfi vurğulayıb ki, onun əsasını sərhəd anlayışının keçid və dəyişimin xüsusi məkanı kimi dərk edilməsi təşkil edir.
“HÜDUD” adının özü müəyyən bir hədd anlayışına işarə edir. Lakin söhbət bir şeyi digərindən ayıran sərt xətdən deyil, formanın eyni zamanda həm sabitliyini itirdiyi, həm də yeni imkanlar qazandığı keçid vəziyyətindən gedir”, – deyə o bildirib.
Kuratorun sözlərinə görə, Tural Möyüfovun əsərlərində insan bədəni məhz fiqurla abstraksiya, sabitliklə parçalanma, daxili impulsla rəngkarlıq forması arasında mövcuddur.
“Mənim üçün vacib olan onun əsərlərində deformasiyanın dağıntı kimi təqdim edilmədiyini göstərmək idi. Əksinə, bu, formanın sərhədlərini araşdırmaq üsulu, onun öz mövcudluğunu və ifadəliliyini qoruyub saxlayaraq nə dərəcədə dəyişə biləcəyini anlamaq cəhdidir”, – deyə S.Səfi vurğulayıb.
O, həmçinin qeyd edib ki, sərgi yalnız insan bədəni mövzusuna toxunmur, eyni zamanda rəngkarlığın öz imkanlarını da üzə çıxarır.
“Bu layihə təsvirin qavrayışın adi çərçivələrindən çıxaraq öz qanunları ilə mövcud olan müstəqil plastik ifadəyə çevrildiyi məqamdan bəhs edir”, – deyə həmsöhbətimiz əlavə edib.
Bölmənin digər xəbərləri
