Anım mərasiminə Xocalı faciəsi qurbanlarının ailə üzvləri də dəvət olunmuşdur
Bakı, 26 fevral (AZƏRTAC). Fevralın 26-da Azərbaycan Respublikası Sahibkarlar (İşəgötürənlər) Təşkilatları Milli Konfederasiyasında (ASK) da Xocalı soyqırımının növbəti ildönümü ilə bağlı keçirilən mərasimə faciə qurbanlarının ailə üzvləri də dəvət olunmuşdur.
ASK-dan AZƏRTAC-a bildirmişlər ki, konfederasiyanın baş katibinin müavini Mehman Mehmanov Xocalı soyqırımının dəhşətli nəticələri haqqında məlumat vermişdir. Bildirilmişdir ki, bu mənfur cinayətin iştirakçıları öz cəzalarına çatmayana şəhidlərimizin ruhu rahatlıq tapmayacaqdır. Mərasimdə belə bir inam ifadə olunmuşdur ki, Xocalı soyqırımı bəşəriyyət tərəfindən layiqli qiymətini alacaq və öz doğma torpaqlarından didərgin düşmüş insanlar evlərinə qayıdacaqlar.
Daha sonra konfederasiya rəhbərliyi Xocalı sakinlərinin məişət qayğıları və problemləri ilə maraqlanmış, onlara ərzaq bağlamaları təqdim edilmişdir.
Qeyd edək ki, tədbir ASK-nın təşkilatçılığı, “Gilan holdinq”, “Karat holdinq”, “Milk-Pro” MMC və “İpək yolu” Sahibkarlığın İnkişafına Dəstək” İctimai Birliyinin dəstəyi ilə keçirilmişdir.
ASK-nın əməkdaşları “İpək yolu” Sahibkarlığın İnkişafına Dəstək” İctimai Birliyinin üzvləri ilə birgə Xətai rayonunda faciə qurbanlarının xatirəsinə ucaldılmış abidəni ziyarət etmişlər.
Bölmənin digər xəbərləri
