Aprel döyüşləri Azərbaycan Ordusunun parlaq qələbəsidir
Bakı, 6 aprel, AZƏRTAC
Aprel döyüşləri Azərbaycan Ordusunun parlaq qələbəsidir. Azərbaycan Silahlı Qüvvələrinin şəxsi heyəti dördgünlük döyüşlərdə düşmənə göstərdi ki, Ordumuz işğal altındakı torpaqları azad etməyə qadirdir.
AZƏRTAC xəbər verir ki, bu fikir aprelin 6-da Azərbaycan Hərb Tarixi Muzeyində (AHTM) 2016-cı ilin aprelində Azərbaycan Ordusunun cəbhədə düşmən üzərində qazandığı qələbəyə həsr olunmuş “Dörd gün və danılmaz dörd həqiqət” mövzusunda tədbirdə səsləndirilib.
Tədbir iştirakçıları əvvəlcə Aprel döyüşlərinə həsr edilən sərgi ilə tanış olublar.
Sonra Azərbaycanın dövlət himni səsləndirilib, şəhidlərin xatirəsi bir dəqiqəlik sükutla yad edilib.
Tədbirdə Aprel döyüşlərində Azərbaycan Ordusunun qəhrəmanlığından bəhs edən film nümayiş olunub.
“Aprel döyüşləri bizim şanlı tariximizdir” mövzusunda məruzə ilə çıxış edən muzeyin rəisi, ehtiyatda olan polkovnik Əzizağa Qənizadə bu əməliyyatların son illər Silahlı Qüvvələrimizdə aparılan genişmiqyaslı islahatların uğurlu nəticələr göstərdiyini, Ordumuzun düşmən üzərində böyük hərbi-psixoloji üstünlüyə malik olduğunu nümayiş etdirdiyini deyib.
Bildirilib ki, 2016-cı ilin aprelində Azərbaycan Ordusu düşmən təxribatlarının qarşısını qəhrəmanlıqla alıb, düşmənə sarsıdıcı zərbələr endirib, Ermənistan ordusunun xeyli canlı qüvvə və texnikasını məhv edib. İşğalçılar Azərbaycanın mövqelərini iriçaplı silahlardan atəşə tutub, təxribat törədiblər. Ancaq Azərbaycan Silahlı Qüvvələrinin bölmələrinin sayıqlığı nəticəsində düşmənin təxribatının qarşısı alınıb və bir sıra strateji yüksəklik ələ keçirilib. Bu döyüşlərdə Azərbaycan Ordusunun düşmən üzərində həm fiziki, həm də mənəvi baxımdan qalib gəldiyinin şahidi olduq. Bu, göstərir ki, əsgərlərimizdə, gizirlərimizdə, zabitlərimizdə Vətənə məhəbbət hissi və döyüş əhvali-ruhiyyəsi yüksək səviyyədədir.
Sonra muzeyin tədqiqatçı elmi işçisi Sevər Həsənovanın “Aprel döyüşləri mətbuat səhifələrində” mövzusunda məruzəsi dinlənilib.
Aprel döyüşlərinin iştirakçıları, polkovnik Qadir Vəlişov, polkovnik-leytenant Eldəniz Sadıqov, polkovnik-leytenant Vüqar Abduləzimov və digərləri Azərbaycan Ordusunun əsgərlərinin, gizirlərinin, zabitlərinin qəhrəmanlıqlarından, döyüş xatirələrindən danışıblar.
Qeyd edilib ki, uzun müddət öz gücü haqqında yüksək fikirdə olan düşmən işğal altındakı ərazilərimizdə qurduğu istehkam xəttinin keçilməz olduğunu düşünürdü. Ermənilər zənn edirdilər ki, Azərbaycan Ordusunun döyüş ruhu zəifdir. Lakin Aprel döyüşlərində düşmənin təxribatlarına tutarlı cavab vermək üçün döyüş meydanına atılan Ordumuz qısa müddət ərzində Ermənistan silahlı qüvvələrinə ağır zərbə vuraraq, xeyli sayda canlı qüvvə və texnikasını məhv etdi, geniş bir ərazini işğalçılardan təmizlədi. Aprel əməliyyatlarından sonra gözü qorxmuş, döyüş ruhu sarsılmış düşmən ordusunun şəxsi heyəti indi də səksəkə içindədir. Çünki Ermənistan ordusu əmin oldu ki, Azərbaycan əsgəri işğal altındakı torpaqlarımızı azad etməyə tam hazırdır və həmin gün uzaqda deyil. Qəhrəman Ordumuzun şəxsi heyətinin döyüş ruhu olduqca yüksəkdir. Azərbaycan Silahlı Qüvvələri işğal altındakı torpaqlarımızı azad etmək və bayrağımızı həmin ərazilərdə dalğalandırmaq üçün tam hazırdır.
Bölmənin digər xəbərləri
