Bariz Mehdiyev: FAO dəyər zənciri boyunca inteqrasiya olunmuş həllər təqdim edir
Bakı, 5 iyun, AZƏRTAC
Qlobal miqyasda kənd təsərrüfatı insan fəaliyyəti nəticəsində yaranan metan emissiyalarının təxminən 40 faizini təşkil edir. Bu emissiyaların əsas mənbələri heyvandarlıq və düyü istehsalıdır. Eyni zamanda, ərzaq itkiləri və qida tullantıları ümumi istixana qazı emissiyalarının təxminən 8-10 faizinə səbəb olur. Tullantılar sektorunda metan emissiyalarının əsas hərəkətverici qüvvələrindən biri qlobal aqroərzaq sistemlərində mövcud olan struktur səmərəsizlikləridir ki, bu da yüksək ərzaq itkisi və tullantı səviyyələri ilə əlaqədardır.
AZƏRTAC xəbər verir ki, bunu Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) Azərbaycandakı nümayəndəsinin müavini Bariz Mehdiyev Ümumdünya Ətraf Mühit Gününə həsr olunmuş beynəlxalq tədbir çərçivəsində keçirilən “Metan Emissiyalarının Azaldılması üçün Birgə Fəaliyyət: Kənd Təsərrüfatı, Enerji və Tullantılar üzrə Həll Yolları” adlı panel tədbirdə çıxış edərkən deyib.
“FAO-nun gördüyü işlərə gəldikdə, təşkilat üzv ölkələrə aqroərzaq sistemlərini daha səmərəli, dayanıqlı və aşağı emissiyalı etmək üçün dəstək verir. Təşkilatın 2022–2030-cu illəri əhatə edən İqlim Dəyişikliyi Strategiyası mövcuddur. Bu strategiya çərçivəsində əsas diqqət metan və digər istixana qazı emissiyalarının, xüsusilə də kənd təsərrüfatı sektorunda azaldılmasına yönəlib. Strategiya, həmçinin dayanıqlı heyvandarlıq və düyü istehsalı sistemlərinin təşviqini, eləcə də ərzaq itkilərinin və tullantılarının azaldılmasına yönəlmiş inteqrasiya olunmuş həllərin inkişaf etdirilməsini əhatə edir. FAO dəyər zənciri boyunca inteqrasiya olunmuş həllər təqdim edir. Kənd təsərrüfatında bu, heyvandarlıq təcrübələrinin təkmilləşdirilməsini, peyin idarəçiliyinin yaxşılaşdırılmasını və iqlimə uyğun ağıllı istehsal metodlarının tətbiqini əhatə edir. Ərzaq sistemlərində məhsul yığımından sonrakı itkilərin daha yaxşı saxlama şəraiti, soyuducu zəncirlər və logistika vasitəsilə azaldılması nəzərdə tutulur”, - deyə B. Mehdiyev qeyd edib.
Bölmənin digər xəbərləri
