Şəhidlərin xatirəsi Brüsseldə anılıb
Brüssel, 27 sentyabr, AZƏRTAC
27 Sentyabr - Anım Günü ilə əlaqədar Azərbaycan Respublikasının Belçika Krallığındakı səfirliyinin dəstəyi, Brüssel Azərbaycan Evinin təşkilatçılığı çərçivəsində Brüsseldə anım tədbiri keçirilib.
AZƏRTAC xəbər verir ki, tədbir Azərbaycanın ərazi bütövlüyü və suverenliyi uğrunda canlarından keçmiş qəhrəman şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Çıxış edən Azərbaycanın Belçika Krallığındakı səfiri Məmməd Əhmədzadə Anım Gününün xalqımızın müasir tarixində dərin mənəvi əhəmiyyət daşıdığını vurğulayıb. Diplomat qeyd edib ki, Anım Günü Azərbaycanın ərazi bütövlüyü və suverenliyi uğrunda canlarından keçmiş şəhidlərimizin əziz xatirəsinə xalqımızın dərin ehtiram və sonsuz minnətdarlığının ifadəsidir.
M.Əhmədzadə Vətən müharibəsində Müzəffər Ali Baş Komandanın rəhbərliyi ilə Azərbaycan Ordusunun qazandığı tarixi Zəfərin xalqımızın milli birliyinin, sarsılmaz iradəsinin, əzmkarlığının və Vətən sevgisinin təcəssümü olduğunu qeyd edib. O, 2023-cü ilin sentyabrında həyata keçirilmiş antiterror tədbirləri nəticəsində Azərbaycanın bütün ərazisində suverenliyinin təmin olunduğunu vurğulayıb. Diplomat Azərbaycan tərəfindən tarixi ədalətin bərpası ilə yanaşı, regionda davamlı sülhün bərqərar edilməsi istiqamətində ardıcıl tədbirlərə, habelə Vaşinqtonda keçirilmiş sammitin tarixi nəticələrinə toxunub.
O, şəhidlərimizin əziz xatirəsinin Azərbaycan xalqının qəlbində daim yaşayacağını vurğulayıb, Vətən uğrunda canlarından keçən qəhrəman şəhidlərimizə Allahdan rəhmət, qazilərimizə isə şəfa diləyib.
Sonra Belçika Azərbaycanlıları Koordinasiya Şurasının Belçika üzrə əlaqələndiricisi, MADANİ platformasının rəhbəri Emin Əliyev, “FireLand” Azərbaycanlılar Birliyinin sədri İlahə Tağıyeva və BUTAM Azərbaycan Mədəniyyət Assosiasiyasının həmtəsisçisi Əliağa Sultanov çıxış ediblər. Çıxışlarda Anım Gününün Azərbaycan tarixindəki mühüm yeri, Vətən müharibəsində Ali Bas Komandanın rəhbərliyi ilə Azərbaycan Ordusunun göstərdiyi misilsiz qəhrəmanlıq və rəşadət, xalqımızın Zəfərə aparan birlik və həmrəyliyi barədə danışılıb.
İcma nümayəndələri Vətən müharibəsi günlərində və sonrakı dövrdə Azərbaycanın haqq səsinin Belçika və Avropa ictimaiyyətinə çatdırılması, ölkəmizin ədalətli mövqeyinin beynəlxalq səviyyədə təbliği istiqamətində həyata keçirilən fəaliyyət barədə məlumat veriblər.
Tədbir çərçivəsində Anım Gününə və Vətən müharibəsinə həsr olunmuş filmlər nümayiş etdirilib.
Bölmənin digər xəbərləri
