“Əbədi yaşayanlar” - Marneulidə şəhidlərin xatirəsi anılıb
Tbilisi, 27 sentyabr, AZƏRTAC
Dünyanın bir çox ölkələrində olduğu kimi, Gürcüstanda yaşayan azərbaycanlılar da 27 Sentyabr - Anım Günü ilə bağlı silsilə tədbirlər təşkil edirlər.
AZƏRTAC xəbər verir ki, Marneulidəki Azərbaycan Evinin və Gürcüstan Azərbaycanlılarının İnteqrasiya Mərkəzinin (GAİM) birgə təşkilatçılığı, Diasporla İş üzrə Dövlət Komitəsinin dəstəyi ilə 27 Sentyabr – Anım Gününə həsr olunmuş “Əbədi yaşayanlar” adlı anım tədbiri keçirilib.
Tədbirdə Azərbaycanın Gürcüstandakı səfiri Faiq Quliyev, səfirliyin hərbi attaşe aparatının rəhbəri polkovnik Arzu Həsənov, səfirliyin əməkdaşları, Türkiyənin Gürcüstandakı səfirliyinin müşaviri Oğuz Akın, səfirliyin hərbi attaşe aparatının rəhbərliyi və zabitləri, Bütün Gürcüstan Müsəlmanları İdarəsinin şeyxi və müftisi Hacı Faiq Nəbiyev və Hacı Etibar Eminov, Marneuli Bələdiyyə Məclisinin üzvləri, şəhid ailələrinin üzvləri və yaxınları, ictimaiyyət nümayəndələri iştirak ediblər.
Tədbir Azərbaycanın və Gürcüstanın ərazi bütövlüyü və suverenliyi uğrunda canından keçən şəhidlərin əziz xatirəsinin bir dəqiqəlik sükutla yad edilməsi ilə başlayıb.
Azərbaycan Evinin və GAİM-in direktoru Məhəbbət İmanov çıxışında bildirib ki, 27 Sentyabr – Anım Günü şəhidlərimizin xatirəsinə ehtiramın göstərilməsi, onların həyat yolunun və qəhrəmanlığının gənc nəslə çatdırılması baxımından xüsusi əhəmiyyət daşıyır. “Əbədi yaşayanlar” adlı tədbirin əsas məqsədi də şəhidlərin xatirəsini yaşatmaq və onların göstərdikləri fədakarlığı gənclərə aşılamaqdır. O, qeyd edib ki, Vətən oğullarının fədakarlığı və qəhrəmanlığı nəticəsində Azərbaycanın ərazi bütövlüyü tam bərpa olunub. Uzun illər ərzində doğma yurd-yuvalarından didərgin düşmüş insanlar doğma torpaqlarına qayıtmaq imkanı əldə ediblər.
Səfir Faiq Quliyev çıxışında şəhidlərin Azərbaycan xalqının yaddaşında əbədi yaşayacağını bildirib. O qeyd edib ki, şanlı Azərbaycan Ordusu Müzəffər Ali Baş Komandan, Prezident İlham Əliyevin rəhbərliyi altında 44 günlük Vətən müharibəsində yeni tarix yazıb. Ordumuz misli görünməmiş igidlik göstərərək, 30 ilə yaxın işğal altında olan torpaqlarımızı azad edib. Bu müharibədə şəhidlərimizin göstərdikləri qəhrəmanlıq və fədakarlıq xüsusi yer tutur.
Səfir işğaldan azad olunmuş ərazilərdə həyata keçirilən quruculuq işləri barədə də ətraflı mlumat verib.
Həmçinin Azərbaycan-Gürcüstan dostluq və qardaşlıq münasibətlərinin əhəmiyyətini vurğulayan diplomat diqqətə çatdırıb ki, Birinci Qarabağ müharibəsində olduğu kimi, 44 günlük Vətən müharibəsində də gürcüstanəsilli azərbaycanlılar Azərbaycanın ərazi bütövlüyünün bərpası uğrunda gedən döyüşlərdə qəhrəmanlıqla iştirak ediblər. Onun sözlərinə görə, hər iki müharibə dövründə Gürcüstanda yaşayan azərbaycanlıların Azərbaycana göstərdikləri mənəvi dəstək xüsusi əhəmiyyət daşıyıb.
Faiq Quliyev qeyd edib ki, şəhidlərin əziz xatirəsini yad edərkən böyük kədər hissi ilə yanaşı, onların göstərdikləri qəhrəmanlıq və fədakarlıqla bağlı qürur hissi keçirir.
Türkiyənin Gürcüstandakı səfirliyinin müşaviri Oğuz Akın çıxışında şəhidlərin xatirəsinin ehtiramla yad edilməsinin vacibliyini vurğulayıb. O, Türkiyə ilə Azərbaycanın qardaşlıq münasibətlərindən də danışıb.
Bütün Gürcüstan Müsəlmanları İdarəsinin şeyxi Hacı Faiq Nəbiyev və müfti Hacı Etibar Eminov çıxışlarında şəhidlərin ailələrinə mənəvi dəstəyin göstərilməsinin, onların xatirəsinin yaşadılmasının mühüm əhəmiyyət daşıdığını bildiriblər.
TİKA-nın Gürcüstan nümayəndəliyinin rəhbəri Salih Özer şəhidlərin xatirəsinə ehtiramını ifadə edib. O, Azərbaycan və Türkiyə arasındakı qardaşlıq bağlarından söhbət açıb.
Tədbirdə şəhid Orxan Məhərrəmovun nənəsi Nazan Məhərrəmova, şəhid Bilal Qəmbərovun bibisi Qiyafət Qəmbərova və dayısı İman Tanrıverdiyev şəhidlərin həyat və döyüş yolundan danışıb, xatirələrini bölüşüblər.
Çıxış edənlər şəhid ailələrinə götərilən diqqət və qayğıya görə, Prezident İlham Əliyevə minnətdarlıq ediblər.
Sonra məktəblilər tərəfindən vətənpərvərlik mövzusunda şeirlər səsləndirilib və “Əbədi yaşayanlar” adlı tamaşa nümayiş etdirilib.
Tədbirin sonunda şəhidlərin əziz xatirəsinə ehsan süfrəsi açılıb və onların ruhuna dualar oxunub.
Bölmənin digər xəbərləri
