Ülviyyə Zülfiqar: Azərbaycanın 35 illik müstəqillik tarixi güclü dövlətçilik ənənələrinin təntənəsidir
Bakı, 18 oktyabr, AZƏRTAC
Azərbaycanın dövlət müstəqilliyinin bərpasının 35-ci ildönümü xalqımızın çoxəsrlik dövlətçilik tarixində mühüm əhəmiyyət daşıyan hadisələrdən biridir. 1991-ci il oktyabrın 18-də Dövlət müstəqilliyi haqqında Konstitusiya Aktının qəbul edilməsi ilə Azərbaycan özünün müstəqil dövlətçilik ənənələrini bərpa edərək yeni tarixi inkişaf mərhələsinə qədəm qoyub. Müstəqilliyin ilk illəri ölkəmiz üçün son dərəcə mürəkkəb siyasi, iqtisadi və hərbi şəraitlə müşayiət olunub. Ermənistanın hərbi təcavüzü, torpaqlarımızın işğalı, daxili siyasi qarşıdurmalar və iqtisadi tənəzzül dövlət müstəqilliyimizin gələcəyini ciddi təhlükə qarşısında qoyub. Belə bir şəraitdə müstəqilliyin qorunub saxlanılması, ölkədə sabitliyin təmin edilməsi və güclü dövlət institutlarının formalaşdırılması Azərbaycanın qarşısında duran ən mühüm vəzifələr olub.
Bu fikirləri AZƏRTAC-a açıqlamasında siyasi şərhçi Ülviyyə Zülfiqar bildirib.
O qeyd edib ki, Azərbaycanın müasir dövlətçilik tarixində həlledici dönüş nöqtəsi 1993-cü ildə Ümummilli Lider Heydər Əliyevin xalqın təkidli tələbi ilə siyasi hakimiyyətə qayıdışı olub: "Ulu Öndərin həyata keçirdiyi məqsədyönlü siyasət nəticəsində ölkədə ictimai-siyasi sabitlik bərpa edildi, dövlət idarəçiliyi möhkəmləndirildi və müstəqil Azərbaycanın gələcək inkişafının siyasi və iqtisadi əsasları yaradıldı. 1994-cü ildə atəşkəsin əldə olunması, həmin ilin sentyabrında “Əsrin müqaviləsi”nin imzalanması, 1995-ci ildə müstəqil Azərbaycanın ilk Konstitusiyasının qəbul edilməsi dövlət quruculuğunun mühüm mərhələlərinə çevrildi".
Siyasi şərhçinin sözlərinə görə, xüsusilə enerji strategiyasının uğurla həyata keçirilməsi ölkəmizin iqtisadi müstəqilliyinin güclənməsinə, beynəlxalq investisiyaların cəlb olunmasına və Azərbaycanın dünya iqtisadiyyatına inteqrasiyasına geniş imkanlar açıb: “Bununla yanaşı, milli maraqlara əsaslanan xarici siyasət kursunun formalaşdırılması Azərbaycanın beynəlxalq münasibətlər sistemində mövqelərinin möhkəmlənməsinə xidmət edib.
Ümummilli Lider Heydər Əliyevin müəyyənləşdirdiyi strateji inkişaf xəttinin Prezident İlham Əliyev tərəfindən yeni dövrün çağırışlarına uyğun şəkildə uğurla davam etdirilməsi Azərbaycanın hərtərəfli inkişafını təmin edib. Ötən illər ərzində ölkəmizin iqtisadi potensialı gücləndirilib, müasir infrastruktur yaradılıb, regionların sosial-iqtisadi inkişafı istiqamətində genişmiqyaslı proqramlar həyata keçirilib".
Ü. Zülfiqar bildirib ki, Bakı-Tbilisi-Ceyhan neft kəməri, Cənub Qaz Dəhlizi və digər strateji layihələr Azərbaycanın beynəlxalq enerji təhlükəsizliyində rolunu artırmaqla yanaşı, onun etibarlı tərəfdaş kimi mövqeyini daha da möhkəmləndirib: "Eyni zamanda, nəqliyyat və logistika imkanlarının genişləndirilməsi, Şərq-Qərb və Şimal-Cənub nəqliyyat dəhlizlərinin inkişafı ölkəmizin regional və beynəlxalq əməkdaşlıqda əhəmiyyətini artırıb. Prezident İlham Əliyevin rəhbərliyi ilə həyata keçirilən ardıcıl siyasət nəticəsində Azərbaycan siyasi və iqtisadi müstəqilliyini möhkəmləndirməklə yanaşı, güclü müdafiə potensialına malik dövlətə çevrilib.
Azərbaycanın 35 illik müstəqillik tarixinin ən mühüm nailiyyəti ərazi bütövlüyünün və dövlət suverenliyinin tam bərpa olunmasıdır. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 2020-ci ildə 44 günlük Vətən müharibəsində qazandığı tarixi Zəfər xalqımızın uzun illər davam edən mübarizəsinin nəticəsi olub. Şuşanın azad edilməsi və işğal altında olan torpaqlarımızın geri qaytarılması Azərbaycan tarixində yeni mərhələnin əsasını qoyub".
Siyasi şərhçi qeyd edib ki, 2023-cü ilin sentyabrında həyata keçirilən lokal xarakterli antiterror tədbirləri nəticəsində ölkəmizin bütün ərazisində dövlət suverenliyi tam təmin edilib: “Qarabağda və Şərqi Zəngəzurda aparılan genişmiqyaslı bərpa-quruculuq işləri, müasir yaşayış məntəqələrinin salınması və Böyük Qayıdış Proqramının həyata keçirilməsi dövlətimizin iqtisadi qüdrətinin və uzunmüddətli inkişaf strategiyasının göstəricisidir.
Bu gün Azərbaycan dövlət müstəqilliyinin bərpasının 35-ci ildönümünü ərazi bütövlüyünü və suverenliyini tam təmin etmiş, beynəlxalq nüfuzunu möhkəmləndirmiş və milli maraqlarına əsaslanan müstəqil siyasət yürüdən dövlət kimi qeyd edir. Azərbaycanın keçdiyi inkişaf yolu güclü dövlətçilik ənənələrinin, milli birliyin, siyasi iradənin və ardıcıl strateji siyasətin nə qədər mühüm əhəmiyyət daşıdığını nümayiş etdirir”.
Bölmənin digər xəbərləri
