ASAN könüllüləri əhali arasında ekoloji sorğular keçirirlər
Bakı, 20 aprel, AZƏRTAC
Qablaşdırma tullantılarının çeşidlənməsi və toplanaraq təkrar emala göndərilməsinə cəlb məqsədilə icra olunan "Təmiz Sumqayıt" layihəsi çərçivəsində ekoloji sorğular keçirilir.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsindən AZƏRTAC-a verilən xəbərə görə, layihə üzrə sorğunun aparılmasında məqsəd əhali arasında çeşidləmə ilə bağlı fikirləri, eləcə də onların çeşidləməyə, təkrar emala və tullantıların çeşidlənməsi üzrə layihələrə münasibətini öyrənməkdir. Toplanmış və təhlil edilmiş nəticələr əsasında müvafiq addımların atılması, maarifləndirmə işlərinin genişləndirilməsi nəzərdə tutulur. Sumqayıt şəhərində sorğuların təşkilinə dayanıqlı inkişaf, ekologiya, təkrar emal, sorğuların tərtibi və emalı təlimlərində iştirak etmiş ASAN könüllüləri və eko-könüllülər cəlb olunublar.
Qeyd edək ki, “Təmiz Sumqayıt” layihəsi “ASAN Könüllüləri” Təşkilatının, Ekologiya və Təbii Sərvətlər Nazirliyinin, Sumqayıt Şəhər İcra Hakimiyyətinin əməkdaşlığı və “Coca-Cola”, “Carlsberg”, “Unilever” kimi bir sıra aparıcı şirkətlərin dəstəyi ilə icra olunur. Layihə üzrə 4 növ tullantı - şüşə, kağız, plastik və metal çeşidlənərək müxtəlif konteynerlərdə toplanır və sonra yenidən emal müəssisələrinə göndərilir.
Tullantıların çeşidlənməsi çirklənmənin qarşısının alınması, təbii ehtiyatların qorunması, enerjiyə qənaət etməklə yanaşı, iqtisadiyyata töhfə verir. Qablaşdırma tullantılarını çeşidləyərək təkrar emala cəlb etmək təbii ehtiyatlardan səmərəli istifadə edilməsinə geniş imkanlar yaradır.
Bölmənin digər xəbərləri
