Bakı, 15 may, AZƏRTAC

Avropa İttifaqının Azərbaycandakı nümayəndəliyi mayın 15-də Bakıda Avropa Günü münasibətilə rəsmi qəbul təşkil edib.

AZƏRTAC xəbər verir ki, tədbirdə çıxış edən Avropa İttifaqının ölkəmizdəki nümayəndəliyinin rəhbəri, səfir xanım Malena Mard Azərbaycan ilə Aİ arasında mövcud əlaqələrin tarixindən danışıb. Qeyd edib ki, bu il ikitərəfli münasibətlərin qurulmasının 25 ili tamam olur. Avropa İttifaqına üzv 28 dövlət demokratiya, sülh və gələcək naminə birlikdə çalışır. Qurum sərhədyanı ölkələrlə də sıx əməkdaşlıq edir. M.Mard əlavə edib ki, tərəflər uzun müddət nəqliyyat, kommunikasiya və digər sahələr üzrə münasibətlərin daha da genişləndirilməsi məsələsi üzərində çalışırlar. Aİ qürur duyur ki, ticarət sahəsində Azərbaycanın ən böyük tərəfdaşı və sərmayədarıdır. İttifaq bununla kifayətlənməyərək qarşılıqlı münasibətləri daha da inkişaf etdirməyə çalışır.

Azərbaycanın xarici işlər nazirinin müavini Mahmud Məmmədquliyev çıxışında ölkəmizlə Aİ arasında əməkdaşlığın daha da inkişafı üçün yaxşı imkanların olduğunu vurğulayıb. Azərbaycanın suverenliyinə və ərazi bütövlüyünə Aİ-nin verdiyi dəstəyə görə təşəkkür edən M.Məmmədquliyev İttifaqın bu istiqamətdə fəaliyyətini gələcəkdə də davam etdirəcəyinə və Ermənistan-Azərbaycan, Dağlıq Qarabağ münaqişəsinin həllinə töhfə verəcəyinə əminliyini bildirib. 2006-cı ildə Azərbaycanla Aİ arasında enerji sahəsində strateji tərəfdaşlıq sənədinin imzalandığını deyən nazir müavini qeyd edib ki, artıq bunun nəticələri özünü göstərir. Azərbaycan gələcəkdə də təşkilatın enerji təhlükəsizliyinə töhfə verməyə davam edəcək. Hazırda strateji tərəfdaşlıqla bağlı yeni sazişin başlanmasına görə danışıqların aparıldığını deyən M.Məmmədquliyev bu sənədin ikitərəfli əlaqələrin inkişafına daha da təkan verəcəyini diqqətə çatdırıb.