İqtisadiyyat İnstitutunun doktoranturasına müraciət edənlərin sayı açıqlanıb
Daxil olmuş 84 müraciətdən ikisi Pakistan, biri isə Əfqanıstan vətəndaşlarına aiddir
Bakı, 17 may, AZƏRTAC
Elm və Təhsil Nazirliyinin İqtisadiyyat İnstitutunda Nazirlər Kabinetinin 2024-cü il 27 mart tarixli qərarı ilə təsdiq edilmiş “Azərbaycan Respublikasının ali təhsil müəssisələrinin, elmi müəssisə və təşkilatlarının 2024-cü il üçün doktorant və dissertant hazırlığı üzrə qəbul planı”na əsasən fəlsəfə doktoru və elmlər doktoru hazırlığı üzrə doktoranturaya və dissertanturaya ərizə qəbulu başa çatıb.
İqtisadiyyat İnstitutundan AZƏRTAC-a verilən məlumata görə, Təhsil şöbəsinin müdiri Ellada Xankişiyeva 2024-cü ildə müəssisədə doktorantura və dissertanturaya qəbulun altı ixtisas - daxili fiskal siyasət və dövlət maliyyəsi, texnoloji innovasiyalar iqtisadiyyatı, iqtisadi nəzəriyyə, ümumi iqtisadiyyat, dünya iqtisadiyyatı və sahə iqtisadiyyatı üzrə aparıldığını bildirıb: “Qəbul planına uyğun ayrılmış 18 yerə 84 müraciət daxil olub. Bu da 2023-cü ilə nisbətən demək olar ki, iki dəfə çoxdur. Ötən il 17 yerə 45 müraciət olmuşdu. Bir yerə 4,7 ərizə düşür. Bəzi ixtisaslar üzrə rəqabət daha böyükdür. Belə ki, fəlsəfə doktoru hazırlığı üzrə ümumi iqtisadiyyat ixtisasına 4 yerə 23, dünya iqtisadiyyatı ixtisasına 2 yerə 17, sahə iqtisadiyyatı ixtisasına 3 yerə 16 müraciət daxil olub”.
E.Xankişiyeva vurğulayıb ki, fəlsəfə doktoru hazırlığı üzrə daxil olmuş müraciətlərin böyük əksəriyyəti doktoranturaya qəbul planı üzrədir. Elmlər doktoru hazırlığı üzrə doktorantura və dissertanturaya ayrılmış 4 yerə 5 nəfər müraciət edib. “Eyni zamanda, daxil olmuş 84 müraciətdən ikisi Pakistan, biri isə Əfqanıstan vətəndaşlarına aiddir. “Təhsil haqqında” Azərbaycan Respublikasının Qanununun 22.12-ci maddəsinə əsasən, doktoranturaya əcnəbilərin və ya vətəndaşlığı olmayan şəxslərin qəbulu ölkəmizin tərəfdar çıxdığı beynəlxalq müqavilələrə, təhsil qrantı proqramına, Azərbaycan Respublikasının “Elm haqqında” qanuna uyğun olaraq, habelə ali təhsil müəssisəsi, elmi müəssisə və təşkilatlara əcnəbi və ya vətəndaşlığı olmayan şəxs arasında bağlanılan müqavilə əsasında həyata keçirilir. Əcnəbilərin və ya vətəndaşlığı olmayan şəxslərin doktorantura və dissertanturada təhsili ödənişli əsaslarla aparılır. Əcnəbilər və ya vətəndaşlığı olmayan şəxslər doktorantura və dissertanturada təhsil müddətində Azərbaycan dili fənnindən əlavə doktorluq imtahanı verirlər”, - deyə şöbə müdiri əlavə edib.
Xatırladaq ki, xarici dil imtahanını müvəffəqiyyətlə vermiş şəxslərin fəlsəfə fənni üzrə imtahanı 2024-cü il sentyabrın 2, 3 və 4-də, ixtisas imtahanı isə sentyabrın 9, 10 və 11-də keçiriləcək.
Bölmənin digər xəbərləri
