Avropa İttifaqının Bakı Limanına dəstək layihəsinin dəyəri 1 milyon avrodur
Bakı, 16 mart, Elvin Camalov, AZƏRTAC
Avropa İttifaqı (Aİ) ilə Bakı limanı arasında reallaşdırılan "Ələtdə yerləşən yeni Bakı Limanı əməliyyat imkanlarının genişləndirilməsinə Aİ-nin dəstəyi" layihəsinin dəyəri 1 milyon avrodur.
AZƏRTAC xəbər verir ki, bu barədə "Bakı Beynəlxalq Dəniz Ticarəti Limanı" QSC-nin baş direktoru Taleh Ziyadov jurnalistlərə açıqlamasında deyib.
O bildirib ki, layihənin müddəti iki ildir. Bu layihə çərçivəsində Bakı limanına Aİ ciddi dəstək göstərəcək. Həyata keçirilən layihə limanın əməliyyatlarının daha da təkmilləşdirilməsinə, eyni zamanda təcrübə mübadiləsinə və Aİ-nin limanları ilə əməkdaşlığın gücləndirilməsinə xidmət edəcək.
"Bu dəstək daha çox bizim insan resurslarımızın, əməliyyatlarımızın inkişafına və eləcə də müxtəlif təcrübələrin öyrənilməsinə, Bakı limanının regionda nümunəvi bir liman statusuna çatdırılması üçün bir yardım mexanizmidir", - deyə T.Ziyadov vurğulayıb.
Bölmənin digər xəbərləri
