Bakı, 14 mart, AZƏRTAC

Avropa Parlamenti (AP), ümumiyyətlə, qlobal lobbilərin təsiri altında olan bir orqandır. Avropa İttifaqının icra orqanlarından fərqli olaraq onların Azərbaycana ənənəvi münasibəti bir qayda olaraq pis olub. Bu da onunla bağlıdır ki, Avropa Parlamentində həm də erməni lobbisi güclüdür. Eyni zamanda, Fransa Avropa Parlamentində əsas söz sahiblərindən biridir. Fransada olan deputatların təsir imkanları Avropa Parlamenti daxilində güclüdür. AP-də azlıqlarla bağlı başqa qruplar da var ki, onlar Azərbaycanı İstanbul Konvensiyasını qəbul etməməyə görə cəzalandırmaq istəyirlər. Orada bir neçə ayrı-ayrı lobbi qruplarının Azərbaycana münasibətdə maraqları üst-üstə düşür. Fransanın deputat qrupunun, erməni lobbisinin, eyni zamanda, digər qrupların təsiri altında olan deputatların maraqları fərqli olsa da eyni vaxtda Azərbaycana münasibətdə vahid cəbhədə çıxış edə bilirlər.

Qənaətimə görə son dövrlərdə bunun intensivləşməsində ən əsas iki səbəb var. Birincisi, Ermənistan beynəlxalq hüquq müstəvisində Azərbaycana dava açıb, həmişə Ermənistan Azərbaycana qarşı informasiya müharibəsi aparırdı. Amma bu, Vətən müharibəsindən sonra daha genişlənib. İkinci əsas səbəb isə Ermənistanın əvvəllər istifadə etmədiyi, yəni, dövlətlərarası mübahisənin beynəlxalq məhkəmələrə keçirilməsidir.

Bu fikirləri AZƏRTAC-a açıqlamasında hüquq müdafiəçisi Sahib Məmmədov söyləyib.

Onun sözlərinə görə, indi Ermənistan Beynəlxalq Ədalət Məhkəməsinə şikayət verərək Azərbaycanı irqi ayrı-seçkiliyin bütün formalarının ləğvi üzrə konvensiyanı pozmaqda ittiham edib. Bununla bağlı işə mahiyyəti üzrə baxılana qədər məhkəmə üçün bir sıra “sübutlar” toplamalıdırlar. Bu “sübutlar” üçün ən yaxşı məkan isə Avropa Parlamentidir. AP-nin qətnamələrində göstərilən saxta faktlar var ki, guya Qarabağda yaşayan erməni əhali blokadadadır, humanitar fəlakət qarşısındadır və guya Azərbaycan bunu qəsdən irqçilik və nifrət zəminində edir.

“Azərbaycan Ermənistanın suveren ərazilərini işğal edib kimi saxta məlumatlar məhkəmədə onlar üçün təqdim edəcəkləri sənədlərin içərisində əsas rol alacaq. İndi davam etməkdə olan BMT-nin İnsan Hüquqları Şurasının əlli ikinci sessiyasında Ermənistanın xarici işlər naziri Ararat Mirzoyanın çıxışları oldu. BMT-nin nizamlanma və müqavilə orqanlarından xeyli sənədlər toplaya biliblər, hansı ki, o sənədlərdə Azərbaycan əleyhinə saxta məlumatlar yer alıb və Azərbaycanı irqçiliklə ittiham edirlər. Beləliklə Ermənistan Azərbaycana qarşı total kampaniyada həm də AP-dən istifadə edir”, - deyə S.Məmmədov bildirib.

“Ermənistan nəyin bahasına olursa olsun, Beynəlxalq Ədalət Məhkəməsindən maraqlarına qismən də olsa uyğun qərar əldə etmək niyyətindədir. Onlar strateji baxımdan qarşılarına üç məqsəd qoyublar. Birincisi, Azərbaycanın erməni xalqına qarşı irqçi siyasət apardığını ümumi şəkildə də olsa göstərən hər hansı bir qərarı əldə etməkdir. İkincisi, həmin qərarı icra etməməklə Azərbaycanı suçlandırmaq və məsələnin BMT Təhlükəsizlik Şurasında (TŞ) müzakirəsinə çatmaqla Azərbaycana sanksiya tətbiqinə nail olmaq. Nəhayət, üçüncüsü, Azərbaycanın işğalçı Ermənistanın siyasi, hüquqi və maddi məsuliyyəti ilə bağlı hazırladığı geniş təzminat iddiasını qabaqcadan neytrallaşdırmaq. Bunun üçün onlara “sübutlar” lazımdır. Onlardan biri də Vətən müharibəsindən dərhal sonra Hərbi Qənimətlər Parkı ilə bağlı başlanmış kampaniya idi. Burada qalib dövlət düşmən tərəfindən əldə etdiyi silahları, hərbi vasitələri nümayiş etdirir. Amma ermənilər bunun ətrafında kampaniya təşkil edərək Azərbaycanı irqçiliklə ittiham etdilər. Ermənistan Azərbaycan dərsliklərindən ibarət bir neçə dildə veb-səhifə yaradıb, Azərbaycanın dərsliklərində irqçi hesab etdikləri fikirləri çıxarıb müxtəlif dillərə tərcümə edərək yerləşdiriblər. Bütün bunlar Ermənistana strateji məqsədlərinə çatmaq üçün qarşılarına qoyduqları məqsədlərdən biridir. Onların niyyəti Azərbaycanı beynəlxalq hüquq müstəvisində məğlubiyyətə uğratmaq, bunun vasitəsilə Azərbaycana sanksiyalar tətbiq etmək və Azərbaycandan güzəştlər əldə etməkdir. Çünki onlar əmindirlər ki, Azərbaycana hərb meydanında qalib gəlməkdə onların şansı yoxdur”, - deyə Sahib Məmmədov diqqətə çatdırıb.

Ölkəmizə qarşı basqının səbəblərindən birinin də Azərbaycanın Qoşulmama Hərəkatındakı müstəsna rolu ilə bağlı olduğunu vurğulayan hüquq müdafiəçisi deyib: “Azərbaycan Qoşulmama Hərəkatına 4-cü ildir ki sədrlik edir. Bu dövrdə Qoşulmama Hərəkatı yeni bir fazaya daxil olaraq, görülməmiş nailiyyətlər əldə edib. Hərəkatın təşkilata çevrilməsi və institutlaşması istiqamətində mühüm addımlar atılıb. Hərəkat qlobal səviyyədə dövlətlərin alternativ forumu funksiyalarını uğurla həyata keçirir. Bütün bunlar Prezident İlham Əliyevin rəhbərliyi ilə həyata keçirilir. Belə bir qüvvənin yaranması bir çox dövlətlərin, o cümlədən Fransanın maraqlarına ziddir”.

Sahib Məmmədovun sözlərinə görə, Fransanın təşəbbüsü və Avropa İttifaqının xarici işlər nazirlərinin qərarı ilə Ermənistan ərazisində “mülki missiya” yerləşdirilib. Missiya üzvlərinin yarısı silahlı jandarmlardır və onlar mülki missiya adlandırıla bilməz. Ermənistan tərəfinin məqsədi odur ki, ölkəmizə qarşı silahlı provokasiyalar törədəcək, Azərbaycan ona cavab verdikcə həmin müşahidə missiyası bunu qeydə alıb Brüsselə göndərəcək. Avropa İttifaqının sonda uzağa gedən planları odur ki, Azərbaycana qarşı hər hansı sanksiyaya nail olacaq. Onların bu missiya vasitəsilə ikinci məqsədləri Rusiyanı regiondan, Ermənistandan sıxışdırıb çıxarmaq və Ermənistanı Avropa İttifaqının təsiri altına almaq planıdır. Erməniçilik hətta erməni dövləti olmayanda belə həmişə kimlərinsə əlində bir alət olub. İndi Avropa İttifaqı həm də erməni dövlətindən Rusiyaya qarşı istifadə etmək istəyir. Bu baxımdan həmin müşahidə missiyası da Avropa İttifaqının Fransanın təşəbbüsü ilə yaratdığı bir təsisatdır və bundan əvvəl onlar bunu Gürcüstanda yaratmışdılar, amma onu yaradarkən həm də Rusiyanın iştirakı və razılığı var idi. Missiya Gürcüstana “Sarkozi planı”na uyğun yerləşdirilmişdi. Amma burada tam legitimdir, heç bir beynəlxalq mandatı yoxdur, Azərbaycan və Rusiya tərəfindən də tanınmır.

“Ermənistanın dövlət olaraq Azərbaycanın ərazilərini işğal etməsinə, ərazilərimizi otuz il işğal altında saxlamasına və orada baş verən qanunsuz fəaliyyətə görə həm hüquqi, həm siyasi, həm də maddi məsuliyyəti var. Eyni zamanda, Ermənistanın siyasi rəhbərliyinin, hərbi rəhbərliyinin, hərbçilərinin, bir çox hallarda mülki əhalisinin Azərbaycan xalqına qarşı törətdiyi müharibə cinayətləri, o cümlədən soyqırımı və insanlıq əleyhinə cinayətləri var. Bunlarla bağlı təəssüf ki, beynəlxalq institutlar bir qayda olaraq susurlar. Heç olmasa Avropa İttifaqı Beynəlxalq Qırmızı Xaç Komitəsinin veb-səhifəsinə baxsa orada görər ki, 4500-ə yaxın azərbaycanlı, o cümlədən qadınlar, uşaqlar, ahıllar, eyni zamanda, hərbçilər girov götürülüb və onların sonrakı taleyi barədə Ermənistan Azərbaycana məlumat vermir. Amma bununla bağlı “hüquq müdafiə edən” beynəlxalq təşkilatlar da, Avropa Parlamenti tipli təşkilatlar da susmaqda davam edir.

Həm Avropa İttifaqının, həm erməni lobbisinin, Fransanın, erməniçiliyin təsiri altında olan və ya azlıqlarla bağlı başqa maraqları olan bir sıra beynəlxalq təşkilatların Azərbaycana qarşı hücumları daha da intensivləşəcək. Biz buna hazır olmalıyıq. Azərbaycan qlobal informasiya məkanında səylərini artırmalıdır. Eyni zamanda, müstəqil siyasi xəttimizi davam etdirməliyik və davam etdirəcəyik. Biz bütün çağırışlara hazır olmalıyıq”, - deyə hüquq müdafiəçisi qeyd edib.