Avropa Şurasına üzv ölkələrə Xocalı faciəsi ilə bağlı bəyanat göndərilmişdir
Bakı, 26 fevral (AZƏRTAC). Azərbaycan Respublikası Gənclər Təşkilatları Milli Şurası (ARGTMŞ) Avropa Şurasına üzv ölkələrdən 38-nə Xocalı faciəsinin 22-ci ildönümü ilə bağlı bəyanat göndərmişdir.
Şuradan AZƏRTAC-a bildirmişlər ki, müraciət ARGTMŞ-in də 2012-ci ilin aprelindən milli əlaqələndiricisi olduğu Avropa İttifaqının “Nifrət Nitqinə Yox” hərəkatına qoşulan 38 ölkənin iştirakçılarına və Avropa Şurasının kampaniya rəsmilərinə göndərilmişdir.
Müraciət çərçivəsində tarixi Azərbaycan torpaqlarının ermənilər tərəfindən zəbt edilməsi və işğalçılar tərəfindən törədilən vəhşilik və cinayətlər haqqında məlumat verilmişdir.
Xocalı faciəsinin tarixin qara səhifəsi olduğunun vurğulandığı bəyanatda ARGTMŞ-in insanların gələcəkdə bu cür vəhşiliyə və nifrətdən doğan cinayətə yol verməyəcəyinə inamı bildirilmişdir. Həmçinin qeyd edilmişdir ki, belə cinayətin şahidi olmuş hər bir azərbaycanlı bu vəhşiliyi və nifrəti pisləyir, milliyyətindən asılı olmayaraq heç kəsin bu cinayətlərin qurbanına çevrilməsini istəmir və “Nifrətə yox!” deyir.
ARGTMŞ-in “Xocalıya ədalət!” təbliğat və məlumatlandırma kampaniyasının səmərəliliyini və bundan sonra daha geniş miqyasda fəaliyyətini təmin etməsi kampaniya ilə anlaşma memorandumu imzalamasından irəli gəlir.
Bölmənin digər xəbərləri
