İQTİSADİYYAT
Avropa Yenidənqurma və İnkişaf Bankının prezidenti Dövlət Neft Fondunun rəhbərliyi ilə görüşüb
![](/files/galleryphoto/2022/3/1200x630/16630503795577751967_1200x630.jpg)
![](/files/galleryphoto/2022/3/1200x630/1663050379587547843_1200x630.jpg)
![](/files/galleryphoto/2022/3/1200x630/16630503792848153828_1200x630.jpg)
Bakı, 13 sentyabr, AZƏRTAC
Azərbaycan Respublikasının Dövlət Neft Fondunda (ARDNF) Avropa Yenidənqurma və İnkişaf Bankının (AYİB) prezidenti xanım Odile Renaud-Bassonun rəhbərlik etdiyi geniştərkibli nümayəndə heyəti ilə görüş keçirilib.
ARDNF-dən AZƏRTAC-a bildirilib ki, işgüzar görüş çərçivəsində Fondun gerçəkləşdirdiyi investisiya siyasəti və investisiya portfelinin başlıca istiqamətləri, ölkədə makro-iqtisadi sabitliyin təmin olunmasında Fondun rolu barədə geniş məlumat verilib.
Neft Fondunun İcraçı direktoru İsrafil Məmmədov çıxışında Azərbaycan Respublikasının 2022-2026-cı illəri əhatə edən Sosial-iqtisadi İnkişaf Strategiyasının əsas hədəflərindən bəhs edərkən, ölkədə fəaliyyət göstərən beynəlxalq maliyyə təşkilatları ilə bu istiqamətdə davamlı əməkdaşlığın əhəmiyyətini vurğulayıb. O, AYİB-in ölkə iqtisadiyyatının diversifikasiyası yolunda maliyyələşdirdiyi orta və uzunmüddətli layihələri yüksək qiymətləndirib.
Görüş zamanı xanım Odile Renaud-Basson təmsil etdiyi təşkilatın Azərbaycandakı gələcək fəaliyyət planları və qurumlar arasında potensial əməkdaşlıq istiqamətləri barədə fikirlərini səsləndirib.