ELM VƏ TƏHSİL
Xalq yazıçısı Elmira Axundovanın kitablarının təqdimatı keçirilib
![](/files/galleryphoto/2024/2/1200x630/17199372442013554929_1200x630.jpg)
![](/files/galleryphoto/2024/2/1200x630/17199372442847928016_1200x630.jpg)
![](/files/galleryphoto/2024/2/1200x630/17199372443191810201_1200x630.jpg)
![](/files/galleryphoto/2024/2/1200x630/17199372443699163320_1200x630.jpg)
![](/files/galleryphoto/2024/2/1200x630/17199372445443619404_1200x630.jpg)
![](/files/galleryphoto/2024/2/1200x630/17199372445876334204_1200x630.jpg)
![](/files/galleryphoto/2024/2/1200x630/1719937244495738345_1200x630.jpg)
![](/files/galleryphoto/2024/2/1200x630/1719937244407035154_1200x630.jpg)
![](/files/galleryphoto/2024/2/1200x630/17199372443203642890_1200x630.jpg)
![](/files/galleryphoto/2024/2/1200x630/17199372444252530591_1200x630.jpg)
![](/files/galleryphoto/2024/2/1200x630/1719937244106250973_1200x630.jpg)
![](/files/galleryphoto/2024/2/1200x630/1719937244400127703_1200x630.jpg)
![](/files/galleryphoto/2024/2/1200x630/17199372442064918705_1200x630.jpg)
Bakı, 2 iyul, AZƏRTAC
İyulun 2-də Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) Xalq yazıçısı Elmira Axundovanın “Aranızda ən böyük dissident mən idim! Heydər Əliyev və yaradıcı ziyalılar” (“Самым большим диссидентом среди вас был я! Гейдар Алиев и творческая интеллигенция”) və “Ədəbi gəzintilər: Zaman... Süjetlər... Düşüncələr” (“Литературные странствия: Время… Сюжеты… Мысли”) adlı kitablarının təqdimatı keçirilib.
AZƏRTAC xəbər verir ki, tədbiri açan AMEA-nın prezidenti akademik İsa Həbibbəyli tanınmış ədəbiyyatşünas Elmira Axundovanın Azərbaycanda və onun hüdudlarından kənarda professional publisist kimi qəbul olunduğunu vurğulayıb.
Elmira Axundovanın Ulu Öndər Heydər Əliyev haqqında ilk sənədli bioqrafik romanın müəllifi olduğunu qeyd edən AMEA rəhbəri vurğulayıb ki, təqdimatı keçirilən kitablar bir-birini tamamlayaraq ölkənin görkəmli şəxsiyyətlərinin, ziyalılarının Ulu Öndərə münasibətlərinə dair müsahibə və oçerklərdən ibarətdir. Bu kitablar Heydər Əliyev epoxasını, strategiyasını, siyasətini əks etdirərək, eləcə də o dövrün mühitini və müasirlərini göstərərək unikal şəkillərlə zəngindir.
Akademik İsa Həbibbəyli qeyd edib ki, yazıçı Elmira Axundova Ümummilli Lider haqqında çoxcildli əsərləri ilə alternativi olmayan qiymətli mənbələrin müəllifidir və Dövlət Mükafatına layiq görülmüş 6 cilddə, 7 kitabdan ibarət “Heydər Əliyev. Şəxsiyyət və zaman” epopeyası onun şah əsəridir.
Daha sonra AMEA-nın Nizami Gəncəvi adına Ədəbiyyat İnstitutunun şöbə müdiri professor Asif Rüstəmli “Xalq yazıçısı Elmira Axundovanın yeni kitabları: dahi şəxsiyyətə və əbədi mövzulara yenidən baxış” mövzusunda məruzə ilə çıxış edib.
Tədbirdə, həmçinin Xalq rəssamı akademik Ömər Eldarov, Xalq artisti professor Xuraman Qasımova, Azərbaycan Mətbuat Şurasının sədri Rəşad Məcid, AMEA-nın Fəlsəfə və Sosiologiya İnstitutunun elmi işlər üzrə direktor müavini tarix elmləri doktoru Eynulla Mədətli, Nizami Gəncəvi adına Ədəbiyyat İnstitutunun aparıcı elmi işçisi dosent Lalə Həsənova və “Qobustan” jurnalının baş redaktoru Pərvin Nurəliyeva çıxış edərək Xalq yazıçısı Elmira Axundovanın əsərlərinin Heydər Əliyev irsinin öyrənilməsi üçün dəyərli mənbə olduğunu qeyd ediblər. Vurğulanıb ki, Heydər Əliyev yaradıcı insanlara həmişə xüsusi hərarətlə yanaşıb, onların problemləri ilə daim maraqlanıb. Çıxışlarda, həmçinin müəllifin görkəmli siyasətçinin milli mədəniyyətin inkişafındakı xidmətlərini hərtərəfli işıqlandırdığı ətraflı qeyd olunub.
Sonda çıxış edən Xalq yazıçısı Elmira Axundova təqdimatı keçirilən əsərlərinin ərsəyə gəlmə prosesindən danışıb, tədbirin təşkilinə görə AMEA rəhbərliyinə və iştirakçılara dərin minnətdarlığını bildirib.