“AZƏRBAYCAN 2006 - TURİZM ALƏMİ” FOTOMÜSABİQƏSİ KEÇİRİLİR
Müsabiqə 4 nominasiya - “Azərbaycan təbiəti”, “İrs” (memarlıq abidələri, tətbiqi sənət, Azərbaycan xörəkləri, təbiət nemətləri və s.), “Əyləncə və istirahət” (mehmanxanalar, əyləncə mərkəzləri, turizm obyektləri, ekstremal turizm növləri və s.), “Sərbəst mövzu” (Azərbaycanım mənim - regionlar) üzrə keçirilir.
Müsabiqənin şərtlərinə görə hər nominasiya üzrə I, II, III yerlərin sahiblərinə diplomlar, hədiyyələr nəzərdə tutulur. Bundan əlavə, iştirakçıların 3 nəfərinə həvəsləndirici mükafat da veriləcəkdir.
“Azərbaycan 2006 - turizm aləmi” fotomüsabiqəsində bütün regionlardan peşəkar və həvəskar fotoqraflar iştirak edə bilərlər. Ərizə blanklarını “ARGO PR” Agentliyindən (Bakı, Bəşir Səfəroğlu küçəsi, 161, of. 12) götürmək olar. Müsabiqəyə fotoəsərlər də həmin agentliyə təqdim edilməlidir. Hər nominasiya üzrə təqdim edilən əsərlər, 5-ə qədər olmaqla, rəngli və ya ağ-qara ola bilər. Əsərlər 20x30 sm, yaxud 30x40 sm ölçüsündə qəbul edilir.
Əsərlər 2006-cı il avqustun 5-dək qəbul olunur. Müsabiqəyə sentyabrın 2-də yekun vurulacaqdır. Münsiflər heyətinin bəyəndiyi işlər kataloqda dərc olunmaqla yanaşı, Səttar Bəhlulzadə adına mərkəzi sərgi salonunda nümayiş etdiriləcəkdir. Maraqlananlar 497 69 40 nömrəli telefona zəng vura bilərlər.
Bölmənin digər xəbərləri
