Azərbaycan çayı Yunanıstanda təqdim olunub
Saloniki, 8 aprel, AZƏRTAC
"QALA" Yunanıstan-Azərbaycan Dostluq cəmiyyətinin Saloniki iqamətgahında Azərbaycan çayını yerli auditoriyaya təqdim edib.
AZƏRTAC xəbər verir ki, təqdimat məclisində çayın hazırlanması, çay içmə mədəniyyəti haqqında məlumat verilməklə yanaşı, bu proses canlı olaraq iştirakçılara nümayiş etdirilib.
Təqdimatda xanım Medeya Damotsiadu bildirib ki, Azərbaycanda əsrlərboyu saraylardakı rəsmi qəbullardan tutmuş elçilik mərasimlərinədək qonaqlara çay təklif olunması adəti bu gün də davam etməkdədir. Medeya xanım Azərbaycan çayının müxtəlif ot və ədviyyatlarla içilməsinin faydaları haqqında məlumat verərək, zəfəran, mixək, nanə, itburnu və s. bitkilərlə müşayiət olunan bir neçə növ çayı armudu stəkanlarda qonaqlara təqdim edib. Azərbaycan çayının zərif ətri və xoş rəngi ilə seçilməsi və süfrəyə, adətən, şirniyyat, mürəbbə, çərəz və limonla birlikdə verildiyi barədə iştirakçılara məlumat verib.
Tədbirdən sonra iştirakçıların bəzilərinə Azərbaycan çay nümunələri hədiyyə edilib. Korais Mədəniyyət Cəmiyyətinin sədri Stratos Tsixlas, "Gürcülər Salonikidə" Cəmiyyətin sədri Zaza Sulamanidze və jurnalist xanım Sofia Prokopidou da tədbirin qonaqları sırasında olub.
Tədbirdən çox məmnun ayrılan qonaqlar belə mədəni məclislərin daha tez-tez keçirilməsini arzulayıblar.
İqbal Hacıyev
AZƏRTAC-ın xüsusi müxbiri
Saloniki
Bölmənin digər xəbərləri
