Azərbaycan Dillər Universitetinin tələbələri Harvard istinad sistemini öyrənirlər
Bakı, 18 aprel, AZƏRTAC
Azərbaycan Dillər Universitetində (ADU) “Düzgün istinad et və plagiata yol vermə: Harvard istinad sistemi ilə tanışlıq” mövzusunda tədbir keçirilib.
ADU-dan AZƏRTAC-a bildirilib ki, tədbirdə təhsil fakültəsinin nəzdində fəaliyyət göstərən kafedraların əməkdaşları və tələbələr iştirak ediblər.
Universitetin təlimdə innovasiyalar kafedrasının baş müəllimi Könül Hacıyeva mövzu ilə bağlı təqdimatla çıxış edib. O, plagiat, istinadetmə anlayışları, plagiatdan yayınma yolları, istinadetmə zamanı qarşıya çıxan problemlər, onların aradan qaldırılması yolları və Harvard istinad sistemi haqqında məlumat verib.
Pedaqogika kafedrasının dosenti Vidadi Bəşirov belə tədbirlərin silsilə şəklində keçirilməsinin vacibliyini vurğulayıb. Təlimdə innovasiyalar kafedrasının müdiri, dosent Aytən Bayramova növbəti tədbirin yaxın günlərdə ADU-nun magistratura şöbəsinin tələbələri üçün keçiriləcəyini qeyd edib.
Bölmənin digər xəbərləri
