AZƏRBAYCAN İLƏ TÜRKİYƏ ARASINDA DOVLƏT QULLUĞU SAHƏSİNDƏ ƏMƏKDAŞLIQ BARƏDƏ PROTOKOL İMZALANMIŞDIR
AZƏRTAC xəbər verir ki, Türkiyədə səfərdə olan Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın sədri Bəhram Xəlilov iyunun 2-də qardaş ölkənin Dövlət Kadrlar İdarəsinin rəhbəri xanım Jalə Ü.Aygüllə görüşmüşdür.
Görüşdə Türkiyə və Azərbaycanda dövlət qulluğu üzrə həyata keçirilən siyasət barədə fikir mübadiləsi aparılmış və qardaş ölkələrimizin bu sahədə əməkdaşlığının perspektivləri müzakirə edilmişdir.
İyunun 3-də B.Xəlilov Türkiyənin dövlət naziri Murat Başesgioğlu ilə görüşmüşdür. Görüşdən sonra Türkiyə Respublikasının Dövlət Kadrlar İdarəsi və Azərbaycan Respublikasının Prezidenti yanında Dövlət Qulluğu Məsələləri üzrə Komissiya arasında “Dövlət qulluğunun idarə olunmasının inkişafı və dəstəklənməsi sahələrində əməkdaşlıq” Protokolu imzalanmışdır.
Sənədi Murat Başesgioğlu və Bəhram Xəlilov imzalamışlar.
Protokola əsasən tərəflər dövlət qulluğunun idarə olunmasının inkişafı və dəstəklənməsi sahələrində qarşılıqlı səfərlərin təşkili, dövlət qulluğunun idarə olunmasının öyrənilməsi və təhlili, dövlət qulluğunun idarə olunmasının inkişafı və dəstəklənməsinə yönələn təlim kursları və seminarların keçirilməsi və əməkdaşlığın inkişaf etdirilməsi qərara alınmışdır.
Protokolun səmərəli şəkildə həyata keçirilməsi məqsədi ilə hər iki tərəfin əlaqələndirici təyin etməsi də sənəddə əksini tapmışdır.
Bölmənin digər xəbərləri
