MƏDƏNİYYƏT
“AZƏRBAYCAN” JURNALININ 80 İLLİK YUBİLEYİ QEYD OLUNMUŞDUR
Yanvarın 29-da Yazıçılar Birliyinin Natəvan adına klubunda “Azərbaycan” jurnalının 80 illik yubileyinə həsr olunmuş yığıncaq keçirilmişdir.
Birliyin sədri, xalq yazıçısı, Milli Məclisin deputatı Anar yığıncağı açaraq ədəbiyyatımızın tarixində bu əlamətdar hadisə münasibətilə jurnalın əməkdaşlarını, tədbirə toplaşan şair və yazıçıları təbrik etdi.
Prezidentin İcra Aparatı humanitar siyasət şöbəsinin müdiri Fatma Abdullazadə “Azərbaycan” və “Literaturnı Azerbaydjan” jurnallarının əməkdaşlarının təltif edilməsi haqqında Azərbaycan Prezidentinin Fərmanının və dövlətimizin başçısının “Azərbaycan” jurnalına təbrik məktubunun mətnlərini oxudu.
Milli Məclisin deputatları Bəxtiyar Vahabzadə, Zəlimxan Yaqub, Sabir Rüstəmxanlı, xalq şairi Qabil, “Ədəbiyyat qəzeti”nin baş redaktoru Ayaz Vəfalı, Nəriman Həsənzadə və başqaları çıxış edərək Azərbaycanda ədəbi-bədii fikrin inkişafında bu məcmuənin əvəzsiz xidmətlərindən danışdılar. Ölkəmizdə mütərəqqi mətbuatın ənənələrini davam etdirən jurnalın ötən 80 ildə ədəbiyyatımızın yaradılmasında, söz sənətimizin daha da zənginləşməsində, oxucuların bədii-estetik zövqünün formalaşmasında böyük rolunu vurğuladılar, topluda çalışmış əməkdaşlarla bağlı xatirələrini söylədilər.
Xalq yazıçısı, jurnalın sabiq baş redaktoru Qılman İlkin, əməkdar incəsənət xadimləri - “Literaturnı Azerbaydjan” jurnalının baş redaktoru Mənsur Vəkilov, “Azərbaycan” jurnalı redaksiya heyətinin üzvləri Mövlud Süleymanlı, əməkdar mədəniyyət işçisi Vaqif Yusifli onların əməyinə verilən yüksək qiymətə görə Azərbaycan Prezidenti Heydər Əliyevə dərin minnətdarlıqlarını bildirdilər.
Ötən 80 ildə ədəbi-bədii toplunun inkişafında rolu olan bütün qələm sahiblərinin xatirəsini yad edən, onların xidmətlərini yüksək qiymətləndirən “Azərbaycan” jurnalının baş redaktoru, əməkdar incəsənət xadimi İntiqam Qasımov ədəbi orqanın bu gün də yaşamasında, nömrələrinin ardıcıl çap edilməsində dövlətimizin başçısının qayğısını böyük minnətdarlıq hissi ilə xatırlatdı. Onlara göstərilən etimada cavab olaraq jurnalın yaradıcı kollektivinin ədəbiyyatımızın inkişafına bundan sonra da sədaqətlə xidmət edəcəyini vurğuladı.