AZƏRBAYCAN KOMANDASININ XÜSUSİ QIŞ OLİMPİYA OYUNLARINDA MEDAL QAZANMAQ ŞANSI BÖYÜKDÜR
AZƏRTAC xəbər verir ki, bu sözləri Azərbaycan Xüsusi Olimpiya Komitəsinin (AXOK) prezidenti Şahin Əliyev oktyabrın 7-də Dünya Xüsusi Qış Olimpiya Oyunlarına hazırlıqla bağlı Trend Xəbərlər Şirkətində keçirdiyi mətbuat konfransında demişdir.
Ş.Əliyev bildirmişdir ki, gələn il fevralın 7-dən 13-dək ABŞ-ın İdaho ştatının Bois şəhərində keçiriləcək bu yarışa Azərbaycan 23 nəfərlik nümayəndə heyəti ilə yollanacaqdır. Ölkəmiz Qış Olimpiya Oyunlarında yalnız döşəmə üzərində xokkey üzrə yarışlarda təmsil olunacaqdır. Azərbaycan komandası 1997-ci ildən bu mötəbər turnirdə qüvvəsini sınayır. Həmişə olduğu kimi, indi də idmançılarımız qarşıdakı yarışa ciddi hazırlaşırlar.
Natiq vurğulamışdır ki, AXOK əlillərin, əqli cəhətdən zəif olan insanların fiziki sağlamlığını qorumaq və onların Dünya Xüsusi Qış Olimpiya Oyunlarında iştirakını təmin etmək məqsədi ilə yaradılmışdır. Əqli qüsurlu insanların cəmiyyətə inteqrasiyasını qarşıya məqsəd qoyan AXOK son illər ərzində 5 mindən çox uşağı idmana, bədən tərbiyəsinə cəlb etmişdir. Komitə tərəfindən ən fəal idmançılar mötəbər yarışlara göndərilirlər.
Komitədə uşaqlar 9 idman növü üzrə yarışlara hazırlaşırlar. Yaxın vaxtlarda bu sıraya cüdo idman növü də əlavə olunacaqdır.
Bölmənin digər xəbərləri
